राज्यातील २९ जिल्ह्यांचा सहभाग; जळगाव जिल्ह्याच्या संघाचीही निवड
जळगाव (प्रतिनिधी): महाराष्ट्रातील महिला फुटबॉलला चालना देण्यासाठी जळगावमध्ये आजपासून राज्यस्तरीय फुटबॉल स्पर्धेला सुरुवात होत आहे. वेस्टर्न इंडिया फुटबॉल असोसिएशन (WIFA), मुंबई यांच्या मान्यतेने ही स्पर्धा आयोजित करण्यात आली असून, राज्यातील विविध जिल्ह्यांमधील महिला फुटबॉल संघ या स्पर्धेत सहभागी होणार आहेत.
स्पर्धेसाठी राज्यातील २९ जिल्ह्यांतील संघांची निवड करण्यात आली आहे. त्यामुळे जळगावमध्ये पुढील काही दिवस महिला फुटबॉलमधील चुरशीच्या लढती पाहायला मिळणार आहेत.
स्पर्धेत सहभागी होणाऱ्या संघांमध्ये जळगाव जिल्ह्याचाही समावेश आहे. जिल्ह्यातील निवड चाचणीनंतर उत्कृष्ट खेळाडूंची निवड करून संघाची निर्मिती करण्यात आली आहे. स्थानिक महिला खेळाडूंना राज्यस्तरावर आपले कौशल्य दाखविण्याची ही महत्त्वाची संधी ठरणार आहे.
निवड झालेल्या खेळाडूंचा संघात समावेश
जळगाव जिल्ह्याच्या संघासाठी कर्णधार अर्चना चौधरी, उपकर्णधार स्वाती गुप्ता यांच्यासह विविध खेळाडूंची निवड करण्यात आली आहे. संघात साक्षी हिंदोळे, ज्योती गिरी, आशिया तडवी, संस्कृती बोरेसे, मेहतक काकरी, आर्या यादव, ईशा पथवे, रोशनी परदेशी, श्यामल पवार, ऋषिका कुलकर्णी, देवयानी सोनावणे, नम्रता बाफिकर, दिव्या मोरे, अक्षता सालटकर, दीपाली सुरवाडे, मन्ना प्रजापत, अंजली चौधरी, हिना देशाई, गोल्फेकर आदी खेळाडूंचा समावेश आहे.
या संघाला प्रशिक्षक म्हणून जैन स्पोर्ट्स अकॅडमीचे अबरार खान यांचे मार्गदर्शन लाभणार असून, संघ व्यवस्थापक म्हणून डॉ. निलेशराज सूर्यवंशी यांची जबाबदारी आहे.
पहिल्या सामन्याकडे लक्ष
स्पर्धेत सहभागी सर्व संघांकडून चांगल्या कामगिरीची अपेक्षा असून, जळगावच्या संघाकडूनही स्थानिक क्रीडाप्रेमींना मोठ्या अपेक्षा आहेत. स्पर्धेतील सामने चुरशीचे होण्याची शक्यता असून, महिला फुटबॉलच्या माध्यमातून जिल्ह्यातील नवोदित खेळाडूंना राज्यस्तरीय व्यासपीठ मिळणार आहे.
जळगावमध्ये महिला फुटबॉलला मिळणारा हा मोठा मंच स्थानिक खेळाडूंसाठी प्रेरणादायी ठरणार असून, स्पर्धेच्या माध्यमातून जिल्ह्यातील महिला फुटबॉलच्या विकासाला चालना मिळण्याची अपेक्षा व्यक्त होत आहे.
