जागतिक ज्युनियर अॅथलेटिक्स स्पर्धेत भारताला उंच व लांब उडीत पहिले पदक
जागतिक ज्युनियर अॅथलेटिक्स अजिंक्यपद स्पर्धेत भारताच्या बसंत कुमार मेघवाल आणि शाहनवाज खान यांनी उल्लेखनीय कामगिरी करत देशाच्या खात्यात दोन पदकांची भर घातली. बसंत कुमारने उंच उडीत रौप्यपदक, तर शाहनवाज खानने लांब उडीत कांस्यपदक पटकावले. विशेष म्हणजे, जागतिक ज्युनियर स्पर्धेतील उंच उडी आणि लांब उडी या दोन्ही प्रकारांत भारताला प्रथमच पदक मिळाले आहे.
बसंत कुमारने २.२१ मीटर उंची पार करत वैयक्तिक सर्वोत्तम कामगिरीची नोंद केली. तर शाहनवाजने लांब उडीत ७.८४ मीटर अंतराची उडी मारून कांस्यपदक मिळवले.
बसंतची सातत्यपूर्ण प्रगती
१९ वर्षीय बसंत कुमार हा आशियाई ज्युनियर विजेता असून त्याने २.२१ मीटर उंची पार केली. अल्जेरियाच्या युनेस अयाचीने सुवर्णपदक मिळवले, तर ग्रेट ब्रिटनच्या ओटिस पूलने कांस्यपदक पटकावले. तिन्ही पदकविजेत्यांनी २.२१ मीटर उंची पार केली होती. त्यानंतर २.२४ मीटर उंची पार करण्याच्या प्रयत्नांत कोणालाही यश आले नाही.
बसंतने यंदाच्या मोसमात आपल्या वैयक्तिक सर्वोत्तम कामगिरीत तब्बल १० सेंटीमीटरने सुधारणा केली आहे. यापूर्वी २११ मीटर अशी नोंद असलेली त्याची कामगिरी आता २२१ मीटरपर्यंत पोहोचली आहे.
बसंतने २०२५ आणि २०२६च्या राष्ट्रीय ज्युनियर फेडरेशन कपमध्ये सुवर्णपदक जिंकले होते. याशिवाय यंदाच्या मे महिन्यात झालेल्या आशियाई ज्युनियर अजिंक्यपद स्पर्धेतही त्याने सुवर्णपदक मिळवले. राजस्थानच्या श्रीगंगानगर जिल्ह्यातील बसंत सध्या भारतीय नौदलात कार्यरत आहे.
शाहनवाजची ७.८४ मीटरची उडी
१८ वर्षीय शाहनवाज खानने लांब उडीत ७.८४ मीटरची सर्वोत्तम उडी मारत कांस्यपदक पटकावले. त्याने तिसऱ्या प्रयत्नात ही कामगिरी केली. त्याच्या सहा प्रयत्नांची मालिका ७.६७, ७.७२, ७.८४, ७.५२, ७.८३ आणि ५.३७ मीटर अशी राहिली.
इटलीच्या डॅनिएले इन्झोलीने ७.९७ मीटरसह सुवर्णपदक जिंकले, तर ७.९० मीटरसह रौप्यपदक मिळाले.
शाहनवाज हा भारतातील प्रतिभावान लांब उडीपटूंपैकी एक मानला जातो. राष्ट्रकुल स्पर्धेतील रौप्यपदक विजेता मुरली श्रीशंकरनेही त्याच्या कामगिरीचे कौतुक केले आहे.
शाहनवाजने यापूर्वी ८.३० मीटर अशी कामगिरी करत भारताचा ज्युनियर राष्ट्रीय विक्रम आपल्या नावावर केला होता. अवघ्या चार महिन्यांत त्याने वैयक्तिक सर्वोत्तम कामगिरी ८२३ मीटरवरून ८३० मीटरपर्यंत सुधारली.
रिले संघांचीही चांगली कामगिरी
महिला ४ बाय ४०० मीटर रिले संघाने अंतिम फेरी गाठली. पात्रता फेरीत संघाने ३ मिनिटे ३९.७३ सेकंद वेळ नोंदवत तिसरे स्थान मिळवले. मात्र अंतिम फेरीत अपेक्षित कामगिरी करता आली नाही.
