भुसावळ | प्रतिनिधी:
भारतीय रेल्वेने आरएसी (Reservation Against Cancellation) तिकिटावर प्रवास करणाऱ्या प्रवाशांसाठी महत्त्वाचा निर्णय घेतला असून, आता आरएसी तिकिटधारकांनाही संपूर्ण बेडरोल (बेडशीट, ब्लँकेट, उशी व टॉवेल) उपलब्ध करून देण्यात येणार आहे. या निर्णयामुळे लांब पल्ल्याच्या प्रवासात आरएसी प्रवाशांची गैरसोय मोठ्या प्रमाणात कमी होणार आहे.
यापूर्वी आरएसी प्रवाशांना एकाच बर्थवर दोन जणांना प्रवास करावा लागत असल्याने बेडरोलच्या उपलब्धतेबाबत अनेकदा अडचणी निर्माण होत होत्या. अनेक वेळा पूर्ण बेडरोल मिळत नसल्याने प्रवाशांकडून तक्रारीही करण्यात येत होत्या. या पार्श्वभूमीवर रेल्वे प्रशासनाने नियमांमध्ये सुधारणा करत आरएसी प्रवाशांनाही नियमित प्रवाशांप्रमाणे संपूर्ण बेडरोल देण्याचा निर्णय घेतला आहे.
रेल्वे अधिकाऱ्यांच्या माहितीनुसार, वातानुकूलित (एसी) डब्यांमध्ये प्रवास करणाऱ्या सर्व आरएसी प्रवाशांना ही सुविधा लागू राहणार आहे. प्रवाशांना बेडशीट, ब्लँकेट, उशी आणि टॉवेलचा स्वतंत्र संच उपलब्ध करून दिला जाईल. त्यामुळे प्रवास अधिक आरामदायी आणि स्वच्छतेच्या दृष्टीने सुरक्षित होईल.
रेल्वेच्या या निर्णयाचे प्रवासी संघटनांनी स्वागत केले असून, विशेषतः रात्रीच्या लांब पल्ल्याच्या प्रवासात याचा मोठा लाभ होणार असल्याचे मत व्यक्त करण्यात आले आहे. आरएसी तिकिटधारकांनाही इतर प्रवाशांप्रमाणे समान सुविधा देण्याच्या दिशेने हा निर्णय महत्त्वाचे पाऊल मानला जात आहे.
रेल्वे प्रशासनाने संबंधित विभागांना आवश्यक सूचना दिल्या असून, बेडरोल वितरण व्यवस्थेत कोणतीही अडचण निर्माण होऊ नये यासाठी आवश्यक नियोजन करण्याचे निर्देशही देण्यात आले आहेत. त्यामुळे आगामी काळात आरएसी प्रवाशांचा प्रवास अधिक सुखकर होण्याची अपेक्षा व्यक्त केली जात आहे.
