रावेर (प्रतिनिधी): रावेर तालुक्यातील वाघोड येथील २२ वर्षीय अभियंता कृष्णल मनोज महाजन यांचे मुंबईत उपचारादरम्यान निधन झाले. कृष्णल हे पुणे येथून अभियांत्रिकीची पदवी घेतल्यानंतर हैदराबाद येथे नोकरीसाठी गेले होते. तेथे सॉफ्टवेअर क्षेत्रातील प्रशिक्षण घेत असताना त्यांना अचानक गंभीर आरोग्यविषयक त्रास झाला.
१५ सप्टेंबरच्या रात्री त्यांना मेंदूविकाराचा तीव्र झटका आला. हैदराबादमध्ये प्राथमिक उपचार केल्यानंतर त्यांना पुढील उपचारांसाठी मुंबईतील सर जे. जे. शासकीय रुग्णालयात दाखल करण्यात आले. मात्र, मेंदूवरील शस्त्रक्रियेची तयारी सुरू असतानाच त्यांची प्रकृती अधिक गंभीर झाली आणि शुक्रवारी सायंकाळी त्यांचे निधन झाले.
कृष्णल हे वाघोड येथील औषधी विक्रेते मनोज प्रभाकर महाजन यांचे धाकटे पुत्र होते. त्यांचे प्राथमिक शिक्षण रावेरच्या मॉडर्न इंग्लिश स्कूलमध्ये झाले. त्यानंतर त्यांनी सरदार जी. जी. हायस्कूलमधून बारावीचे शिक्षण पूर्ण केले.
सुमारे तीन महिन्यांपूर्वीच ते हैदराबादला गेले होते. तेथे सॉफ्टवेअर कोर्सचे प्रशिक्षण घेत असताना ही दुर्दैवी घटना घडली. प्रकृती गंभीर झाल्यानंतर त्यांच्या मित्रांनी तत्काळ रुग्णालयात दाखल केले. त्यानंतर कुटुंबीयांनी मुंबईत आणून उपचार सुरू केले.
डॉक्टरांच्या माहितीनुसार, उपचारादरम्यान त्यांच्या मेंदूत रक्तपुरवठा होत नसल्याचे आढळून आले. शस्त्रक्रियेची तयारी सुरू असतानाच अचानक रक्तदाब आणि हृदयाच्या ठोक्यांमध्ये गंभीर बदल झाल्याने त्यांची प्रकृती खालावली.
शनिवारी सकाळी त्यांचे पार्थिव वाघोड येथे आणण्यात येणार असून त्यानंतर अंत्यसंस्कार करण्यात येणार आहेत. त्यांच्या पश्चात आई-वडील, भाऊ, बहीण आणि इतर कुटुंबीय असा परिवार आहे.
