शेंदुर्णी–पहूर मार्गावरील घटना; वाहनाच्या सुरक्षिततेसह वाहतूक व्यवस्थेवर प्रश्नचिन्ह
जळगाव (प्रतिनिधी) : जामनेर तालुक्यातील शेंदुर्णी–पहूर मार्गावर शालेय पोषण आहाराची वाहतूक करणाऱ्या टेम्पोला अपघात झाला. वाहनाचा टायर फुटल्याने टेम्पो अनियंत्रित होऊन उलटला. या दुर्घटनेत पोषण आहाराच्या गोण्यांवर बसलेल्या दोन हमालांचा मृत्यू झाला. ही घटना बुधवारी घडल्याचे वृत्त आहे.
मिळालेल्या माहितीनुसार, संबंधित वाहन पाचोरा येथून शालेय पोषण आहार घेऊन जात होते. प्रवासादरम्यान वाहनाचा टायर फुटल्याने चालकाचे वाहनावरील नियंत्रण सुटले आणि टेम्पो रस्त्यावर उलटला. वाहनातील पोषण आहाराच्या गोण्यांवर बसलेले हमाल जगदीश पाटील आणि अर्जुन पाटील गंभीर जखमी झाले. मात्र उपचारापूर्वीच त्यांचा मृत्यू झाला.
वाहतुकीच्या पद्धतीवर प्रश्न
या अपघातामुळे शालेय पोषण आहाराच्या वाहतुकीदरम्यान कामगारांच्या सुरक्षेचा मुद्दा पुन्हा चर्चेत आला आहे. मालवाहू वाहनात कामगारांना मालासोबत बसवून नेले जात असल्याची माहिती समोर आली असून, अशा पद्धतीने वाहतूक करणे सुरक्षित आहे का, याबाबत प्रश्न उपस्थित होत आहेत.
वाहनाची फिटनेस तपासणी होणार का?
अपघातानंतर संबंधित वाहनाची फिटनेस स्थिती, कागदपत्रे, टायरची अवस्था आणि वाहतुकीदरम्यान आवश्यक सुरक्षा नियमांचे पालन झाले होते का, याची चौकशी करण्याची मागणी होत आहे. पहूर पोलिसांनी घटनास्थळी दाखल होऊन तपास सुरू केला आहे. अपघाताची नेमकी कारणे आणि जबाबदारी निश्चित होणे महत्त्वाचे ठरणार आहे.
