जळगाव (प्रतिनिधी) : येथील समस्त लाडवंजारी समाज श्रीराम मंदिर संस्थेतर्फे माजी केंद्रीय ग्रामविकास मंत्री स्व. गोपीनाथराव मुंढे यांच्या जयंतीनिमित्त शहरात १२ डिसेंबर रोजी भव्य मिरवणुकीचे आयोजन करण्यात आले आहे. छत्रपती शिवाजी महाराज यांच्या पुतळ्यापासून ते लाडवंजारी समाज मंदिरापर्यंत ही मिरवणूक काढण्यात येणार आहे.
या मिरवणुकीत मुंढे साहेबांची भव्य प्रतिमा आकर्षणाचे केंद्र असेल. तसेच, संत ज्ञानेश्वर विद्यालयाच्या विद्यार्थ्यांचे लेझीम पथक, समाज जीवनावरील चित्ररथ आणि ढोलताशे वाद्य वृंदाचा समावेश असणार आहे. यामुळे मिरवणुकीला एक उत्साहाचे आणि आदरांजलीचे स्वरूप प्राप्त होईल. मिरवणुकीचे नियोजन माजी नगरसेवक प्रशांत नाईक हे करीत आहेत. या कार्यक्रमात जळगाव जिल्ह्यातील समाज बांधवांसह अधिकारी आणि पदाधिकारी मोठ्या संख्येने उपस्थित राहतील, अशी अपेक्षा आहे.
या कार्यक्रमासाठी जास्तीत जास्त समाज बांधवांनी उपस्थिती द्यावी, असे आवाहन संस्थेचे अध्यक्ष चंद्रकांत लाडवंजारी, उपाध्यक्ष विजय वंजारी आणि सचिव प्रवीण सानप यांनी केले आहे.
