रोटरी जळगावमध्ये वंदे मातरम सार्ध शती उत्साहात
जळगाव (प्रतिनिधी) : भारत भाषा, प्रांत व धर्म यासारख्या विविधतेचा असून वंदे मातरम मंत्राने त्याला एकत्र जोडले. भारतीय संस्कृती जोडून ठेवणारी असल्याचे प्रतिपादन राष्ट्रीय युवा योजनेचे नरेंद्र वडगावकर यांनी केले. रोटरी क्लब जळगावच्या साप्ताहिक सभेत वंदे मातरम सार्ध शती व भारत जोडो या विषयावर ते बोलत होते.
या प्रसंगी व्यासपीठावर अध्यक्ष गिरीश कुळकर्णी व मानद सचिव सुभाष अमळनेरकर होते. डाॅ. एस. एन. सुब्बाराव यांच्या मार्गदर्शनात नैसर्गिक आपत्तीत व भारत जोडो अभियानातून आपले व्यक्तिमत्त्व घडले व आयुष्याला दिशा मिळाली असेही वडगावकर म्हणाले. चंबळ खोऱ्यातील ६५४ डाकूंच्या पुनर्वसनाचे, वर्ष २००० मध्ये ओरीसात झालेल्या चक्रीवादळातील कार्याचे राष्ट्र सेवा दलाच्या मानवतेच्या कार्याचे अनुभव त्यांनी कथन केले. १६५२ संवादाच्या बोली भाषा असलेल्या आपल्या देशात राष्ट्रीय एकात्मता दिसून येते. भारत जोडो व युवा प्रशिक्षण वर्गातील भाषा समृद्धीचे अनुभव त्यांनी सांगितले.
कार्यक्रमाच्या सुरुवातीस तिरंग्यातील रंगांचे वस्त्र परिधान केलेल्या सदस्यांनी आपल्या बोटांच्या ठशांनी तिरंगी रंगात वंदे मातरम साकारले. गिरीश कुळकर्णी यांनी वंदे मातरमचा दिडशे वर्षांचा प्रवास दृकश्राव्य माध्यमातून समजावून सांगितला.
उपस्थितांनी वंदे मातरम या राष्ट्रीय गीताचे संपूर्ण गायन केले. कॅप्टन मोहन कुलकर्णी यांनी परिचय तर डाॅ. पराग जहागिरदार यांनी आभार प्रदर्शन केले. कार्यक्रमास माजी प्रांतपाल डाॅ. चंद्रशेखर सिकची, माजी अध्यक्ष जितेंद्र ढाके, डाॅ. प्रदीप जोशी, ॲड. प्रविणचंद्र जंगले, किशोर मंडोरा, संदिप शर्मा, डाॅ. तुषार फिरके, डाॅ. जयंत जहागिरदार व मान्यवर सदस्य परिवारासह उपस्थित होते.
