केंद्रीय मंत्री रक्षा खडसेसह मान्यवरांची उपस्थिती
जळगाव, ( प्रतिनिधी )- जळगाव जिल्ह्यात पर्यावरण संवर्धनासाठी एक महत्त्वपूर्ण पाऊल उचलण्यात येत असून, “एक पेड मा के नाम” या केंद्र शासन निर्देशित महावृक्षारोपण अभियानाचे आयोजन शनिवार, दि. ५ रोजी सकाळी १० वा. भुसावळ येथील चोरवड येथे करण्यात आले आहे.
या अभियानाचे उद्घाटन केंद्रीय युवा कार्य व क्रीडा मंत्री रक्षा खडसे यांच्या प्रमुख उपस्थितीत होणार असून यावेळी वस्त्रोद्योग मंत्री संजय सावकारे, जिल्हाधिकारी आयुष प्रसाद, जिल्हा परिषदेचे मुख्य कार्यकारी अधिकारी मीनल करनवाल, , पोलीस अधीक्षक जळगाव आणि अन्य मान्यवर अधिकारी उपस्थित राहणार आहेत.
हे अभियान युवा कार्य व क्रीडा मंत्रालय (भारत सरकार), जिल्हा प्रशासन, मेरा युवा भारत (MY Bharat) व राष्ट्रीय सेवा योजना (NSS) यांच्या संयुक्त विद्यमाने राबवण्यात येत आहे.या उपक्रमाचे वैशिष्ट्य म्हणजे २ हजार वृक्षांचे रोपण करण्यात येणार असून, जिल्ह्यात पर्यावरण जागृती आणि हरित चळवळीत नवचैतन्य निर्माण करण्याचा हेतू यामागे आहे.
कार्यक्रमाच्या निमित्ताने जिल्ह्यातील सर्व नागरिक, स्वयंसेवी संस्था, युवक मंडळे, विद्यार्थी आणि सामाजिक कार्यकर्त्यांना मोठ्या संख्येने सहभागी होण्याचे आवाहन आयोजकांकडून करण्यात आले आहे.
