एरोबिक जिम्नॅस्टिक्समध्ये अरिहाचा सुवर्णवेध; आशियाई अजिंक्यपदात ऐतिहासिक कामगिरी

भारताची युवा खेळाडू अरिहा पांगमने एरोबिक जिम्नॅस्टिक्सच्या आशियाई अजिंक्यपद स्पर्धेत शानदार कामगिरी करत सुवर्णपदक पटकावले. या कामगिरीसह आशियाई अजिंक्यपद स्पर्धेत सुवर्णपदक जिंकणारी ती पहिली भारतीय खेळाडू ठरली आहे.

अंतिम फेरीत अरिहाने १९.१०० गुण मिळवत अव्वल स्थान मिळवले. तिच्या उत्कृष्ट सादरीकरणामुळे भारताच्या खात्यात या स्पर्धेतील पहिले सुवर्णपदक जमा झाले.

अरिहाने अंतिम फेरीतील सादरीकरणात सातत्यपूर्ण आणि प्रभावी खेळ दाखवत परीक्षकांची दाद मिळवली. तिला कलात्मक सादरीकरणासाठी ८.६५०, अंमलबजावणीसाठी ९.६०० आणि कठिनतेसाठी २.८५० गुण मिळाले. या सर्व गुणांच्या आधारे तिची एकूण कामगिरी सर्वोत्तम ठरली.

अरिहाच्या या ऐतिहासिक विजयामुळे भारतीय एरोबिक जिम्नॅस्टिक्सच्या क्षेत्रातील देशाची कामगिरी आणखी उंचावली असून, तिच्या यशाचे क्रीडा क्षेत्रातून कौतुक होत आहे.