रामानंद नगर पोलिसांच्या कारवाईत तब्बल ३६ लाखांची घरफोडी उघड

चार संशयित आरोपींकडून ३१० ग्रॅम सोने, २५० ग्रॅम चांदी जप्त; माहिती पोलीस अधीक्षक डॉ. महेशवर रेड्डी यांची माहिती

जळगाव (प्रतिनिधी) : रामानंद नगर पोलिसांनी केलेल्या कारवाईत तब्बल ३६ लाखांची घरफोडी उघड झाली आहे. अटक केलेल्या चार संशयित आरोपींकडून ३१० ग्रॅम सोने आणि २५० ग्रॅम चांदीचा मुद्देमाल हस्तगत करण्यात आला आहे. या कारवाईत तीन गुन्हे उघडकीस आले असल्याची माहिती पोलीस अधीक्षक डॉ. महेशवर रेड्डी यांनी शुक्रवारी पत्रकार परिषदेत दिली.

रामानंद नगर पोलीस स्टेशनचे सहायक पोलीस निरीक्षक भूषण कोते यांच्या पथकाला १९ सप्टेंबर रोजी रात्रीच्या गस्तीवर असताना दोन इसम संशयीत रित्या फिरताना आढळले. पाठलाग करून त्यांना पकडण्यात आले. सखोल चौकशीत त्यांनी मोहाडी रोड येथील घरफोडीची कबुली दिली. आरोपी रवि प्रकाश चव्हाण (वय 21, रा. तांबापूरा) आणि शेख शकील शेख रफीक (वय 30, रा. रामनीगंज) यांना अटक करण्यात आली. या कारवाईत घरफोडीच्या गुन्ह्यातील तब्बल ३१० ग्रॅम सोने आणि २५० ग्रॅम चांदीसह ३६ लाखांहून अधिक किमतीचा मुद्देमाल हस्तगत केला आहे. या कारवाईमुळे दोन घरफोडी आणि एक दुचाकी चोरीचा असे एकूण तीन गुन्हे उघडकीस आले आहेत.

१५ मे ते १ जून या कालावधीत बंद घरात झाली होती चोरी
पोलिसांनी दिलेल्या माहितीनुसार, १ जून रोजी लिलाधर खंबायत यांनी रामानंद नगर पोलिस स्टेशनमध्ये तक्रार दाखल केली होती. त्यांचे साडू नरेंद्र बाध हे परदेशी गेलेले असताना, १५ मे ते १ जून या कालावधीत त्यांच्या मोहाडी रोड, पार्वतीबाई काळे नगर येथील बंद घरात अज्ञात चोरट्यांनी दरवाजाचे कुलूप तोडून प्रवेश केला होता. चोरट्यांनी घरातून ३५७ ग्रॅम वजनाचे सोन्याचे दागिने, २५० ग्रॅम वजनाची चांदीची भांडी व दागिने आणि ८५ हजार रुपये रोख रक्कम तसेच डीव्हीआर, वायफाय मॉडेल असा एकूण ३६ लाख ८३, हजार रुपये किमतीचा मुद्देमाल चोरून नेला होता.

पाठलाग करून पथकाने दोघांना पकडले
गुन्हा दाखल होताच, पोलिस अधीक्षक महेश्वर रेड्डी, अपर पोलीस अधीक्षक अशोक नखाते, विभागीय पोलिस अधिकारी नितीन गणापूरे यांच्या मार्गदर्शनाखाली पोलीस निरीक्षक राजेंद्र गुंजाळ यांच्या पथकाने तपास सुरू केला. दरम्यान, १९ सप्टेंबर रोजी रात्रीच्या गस्तीवर असताना सहायक पोलीस निरीक्षक भूषण कोते यांच्या पथकाला दोन इसम संशयीत रित्या फिरताना आढळले. पाठलाग करून त्यांना पकडण्यात आले. सखोल चौकशीत त्यांनी मोहाडी रोड येथील घरफोडीची कबुली दिली. आरोपी रवि प्रकाश चव्हाण (वय 21, रा. तांबापूरा) आणि शेख शकील शेख रफीक (वय 30, रा. रामनीगंज) यांना अटक करण्यात आली. या आरोपींच्या माहितीवरून त्यांचे साथीदार जनंद उर्फ मस्तकीम भिकन शहा आणि गुरुदयालसिंग मनजित टाक यांनाही २० सप्टेंबर रोजी अटक करण्यात आली.

पोलीस अधीक्षक डॉ. महेशवर रेड्डी यांनी केले पथकाचे अभिनंदन
तपासादरम्यान, आरोपींनी सोने-चांदीचे दागिने सुरत व जामनेर येथे विकल्याचे कबूल केले. त्यानुसार रामानंद नगर पोलिसांनी वेगाने कारवाई करत, चोरीस गेलेल्या मुद्देमालापैकी ३३ लाख ८३ हजार किमतीचे ३१० ग्रॅम वजनाचे सोन्याचे दागिने आणि २५० ग्रॅम चांदीची लगड असा ऐवज हस्तगत करण्यात यश मिळवले. या यशस्वी कामगिरीमुळे रामानंद नगर पोलीस ठाण्यात सह इतर दोन घरफोडी आणि एक दुचाकी चोरीचा असे तीन गुन्हे उघडकीस आले आहेत. या कारवाईबद्दल पोलीस अधीक्षक डॉ. महेशवर रेड्डी यांनी या पथकाचे अभिनंदन केले आहे.