महाराष्ट्र राज्य परीक्षा परिषद – TAIT परीक्षा निकाल लवकरच जाहीर होणार
अफवांवर विश्वास ठेवू नका – आयुक्त अनुराधा ओक
जळगाव (प्रतिनिधी) : महाराष्ट्र राज्य परीक्षा परिषदेच्या वतीने शिक्षक अभियोग्यता व बुध्दीमत्ता चाचणी (TAIT) परीक्षा २०२५ चे आयोजन IBPS या संस्थेमार्फत ऑनलाईन पद्धतीने २७ ते ३० मे आणि २ ते ६ जून २०२५ दरम्यान करण्यात आले होते. राज्यातील २६ जिल्ह्यांतील ६० परीक्षा केंद्रांवर झालेल्या या परीक्षेत प्रतिदिन तीन सत्रांमध्ये एकूण २२८८०८ परीक्षार्थ्यांनी नोंदणी केली होती. त्यापैकी २१९३०८ उमेदवार परीक्षेला उपस्थित होते.
गुणपत्रक किंवा वैध प्रमाणपत्र परीक्षा परिषदेकडे सादर करण्यासाठी कमाल एका महिन्याचा कालावधी देण्यात आला होता. मात्र विविध संस्थांचे निकाल वेगवेगळ्या वेळी लागल्याने निकाल जाहीर करण्यात विलंब होत आहे. डी. एल. एड. परीक्षेचा निकाल ५ ऑगस्ट २०२५ रोजी जाहीर झाला असून, आता TAIT परीक्षेच्या निकालाची कार्यवाही सुरू आहे.
निकाल लवकरच महाराष्ट्र राज्य परीक्षा परिषदेच्या अधिकृत संकेतस्थळावर प्रकाशित केला जाणार आहे. उमेदवारांनी युट्युब चॅनेल्स किंवा सोशल मिडिया प्लॅटफॉर्मवर फिरणाऱ्या अफवांवर विश्वास न ठेवता केवळ परिषदेच्या संकेतस्थळावरील सूचनांचा आधार घ्यावा, असे आवाहन आयुक्त अनुराधा ओक यांनी केले आहे.
