जळगाव (प्रतिनिधी) : डॉ. अण्णासाहेब जी. डी. बेंडाळे महिला महाविद्यालयात उद्योजकता मंच समिती तर्फे स्वयंम सहाय्यता गट आणि महिला उद्योजकता या विषयावर जळगाव जनता सहकारी बँकेच्या व्यवस्थापिका प्रियंका झोपे यांचे व्याख्यान आयोजित करण्यात आले. त्यांनी आपल्या स्वयंम सहाय्यता गट आणि महिला उद्योजकता संबंधीचे विचार मांडत असताना वेगवेगळ्या व्यवसायातील अनुभव सांगितला.
प्रास्ताविक अर्थशास्त्र विभाग प्रमुख डॉ. विनोद नन्नवरे यांनी केले. प्रियंका यांनी जागतिक स्वयंम सहायता गटाचे प्रणेते डॉ. मोहम्मद युनुस यांनी बचत गटांच्या माध्यमातून महिला स्वयंपूर्णतेकडे कशी वाटचाल करू शकतात यांचे महत्व सांगितले तसेच आपले उत्पन्न ठराविक कालावधीसाठी जास्त असते मात्र उत्पन्नामध्ये दिर्घकालावधीत अस्थिरता निर्माण होते म्हणून आज आपण या गटांच्या माध्यमातून उत्पन्नामध्ये संतुलन ठेऊ शकतो, आज बचत गट म्हणजे फक्त कमी उत्पन्न असलेल्या वर्गासाठी नव्हे तर सर्वांनी यामध्ये सहभाग घ्यावा व आपली कौशल्य स्वतःच्या विकासासाठी साध्य करावीत, तसेच कौशल्य विकास आपण शिक्षण म्हणून न बघता त्याकडे कौशल्य म्हणून बघा तो पर्यंत आपण विकास साधू शकत नाही.
व्यवसाय म्हणजे जे कौशल्य आपल्याकडे आहे ते शोधणे होय. अपयश आले तरी त्यातून शिकून पुन्हा उभे राहणे हेच खऱ्या यशाचे रहस्य आहे. जीवनातील संघर्ष, अडथळे आणि आव्हाने स्वीकारून ज्यांनी कष्टाने प्रगती साधली, त्यांची उदाहरणे आपल्याला पुढे जाण्यास प्रवृत्त करतात. म्हणूनच, प्रत्येकाने आपल्या क्षमतेवर विश्वास ठेवून, सातत्याने प्रयत्न करून आणि समाजासाठी उपयुक्त कार्य करून यशाकडे वाटचाल केली पाहिजे असे मत त्यांनी व्यक्त केले.
अध्यक्षीय विचार मांडतांना महाविद्यालयाचे उप-प्राचार्य डॉ. सत्यजित साळवे यांनी स्वयंम सहायता गट हे केवळ आर्थिक संघटन नाही, तर सामाजिक परिवर्तनाचे प्रभावी साधन आहे. महिला सक्षमीकरण आणि आत्मनिर्भरता या दृष्टीने याचे महत्त्व खूप मोठे आहे असे सांगितले. या प्रसंगी महाविद्यालयातील या कार्यक्रमास प्राध्यापक व विद्यार्थिनी मोठ्या संख्येने उपस्थित होते. सूत्रसंचालन डॉ. सचिन कुंभार यांनी केले तर आभार प्रा. मंगेश किनगे यांनी मानले.
