रावेर (प्रतिनिधी): रावेर-यावल परिसर हा राज्यातील प्रमुख केळी उत्पादक आणि निर्यातक्षम भाग म्हणून ओळखला जातो. या भागातील केळी निर्यात अधिक प्रभावी करण्यासाठी शीतसाखळी (कोल्ड चेन) सुविधांच्या विकासाला प्राधान्य देण्याची गरज असल्याचे मत विविध तज्ज्ञ आणि केंद्रीय संस्थांच्या प्रतिनिधींनी व्यक्त केले.
अलीकडेच झालेल्या आढावा बैठकीत केळी उत्पादन, साठवणूक, वाहतूक आणि निर्यात प्रक्रियेत येणाऱ्या अडचणींचा सविस्तर आढावा घेण्यात आला. शीतगृहांची क्षमता वाढविणे, आधुनिक पॅकहाऊस सुविधा उपलब्ध करणे आणि कंटेनर वाहतुकीसाठी आवश्यक पायाभूत सुविधा निर्माण करणे यावर चर्चा झाली.
अधिकाऱ्यांनी परिसरातील विद्यमान कोल्ड स्टोरेज सुविधा, शेतकरी उत्पादक गटांची भूमिका तसेच निर्यात साखळीतील विविध घटकांचा अभ्यास केला. शीतसाखळी अधिक सक्षम झाल्यास केळीची गुणवत्ता टिकवून ठेवण्यास मदत होईल आणि निर्यात वाढीस चालना मिळेल, असे मत बैठकीत व्यक्त करण्यात आले.
याशिवाय भविष्यात कंटेनर रेल्वे टर्मिनलसारख्या सुविधांबाबत व्यवहार्यता तपासून आवश्यक निर्णय घेण्याबाबतही सकारात्मक चर्चा झाल्याची माहिती संबंधित सूत्रांनी दिली. या उपक्रमांमुळे परिसरातील शेतकऱ्यांना अधिक चांगल्या बाजारपेठा उपलब्ध होण्यास मदत होईल, अशी अपेक्षा व्यक्त केली जात आहे.
