रावेर (प्रतिनिधी) : सावखेडा व उटखेडा परिसरात गेल्या काही दिवसांपासून मोठ्या प्रमाणात मातीची वाहतूक सुरू असल्याचे नागरिकांकडून सांगितले जात आहे. दिवसरात्र सुरू असलेल्या ट्रॅक्टर व डंपर वाहतुकीमुळे परिसरातील रस्त्यांवर धूळ उडत असून ग्रामस्थांना त्रास सहन करावा लागत आहे.
स्थानिक नागरिकांच्या म्हणण्यानुसार, काही ठिकाणी रस्त्यांची अवस्था खराब होत असून शालेय विद्यार्थी, दुचाकीस्वार आणि पादचारी यांना प्रवास करताना अडचणी निर्माण होत आहेत. तसेच सततच्या वाहनांच्या आवाजामुळे नागरिकांमध्ये नाराजीचे वातावरण आहे.
ग्रामस्थांनी प्रशासनाने या प्रकरणाची दखल घेऊन वाहतुकीची तपासणी करावी, नियमांचे पालन होत आहे का याची खात्री करावी आणि आवश्यक त्या उपाययोजना कराव्यात, अशी मागणी केली आहे.
दरम्यान, संबंधित विभागांकडून परिस्थितीवर लक्ष ठेवले जात असल्याचे सांगण्यात येत असून, नियमबाह्य प्रकार आढळल्यास योग्य ती कारवाई केली जाईल, अशी माहिती सूत्रांकडून मिळाली आहे.
