पाचोरा (प्रतिनिधी) : येथील ग्रुप ग्रामपंचायत आसनखेडा बुद्रुक आणि ह्युमन डेव्हलपमेंट फाउंडेशन, पाचोरा यांच्या संयुक्त विद्यमाने ‘मुख्यमंत्री समृद्ध पंचायत राज अभियान’ अंतर्गत तीन दिवसीय महिला स्वयंरोजगार प्रशिक्षण व मार्गदर्शन मेळावा उत्साहात पार पडला. या प्रशिक्षणाद्वारे गावातील महिलांना मसाला उद्योग आणि केळी प्रक्रिया उद्योगाचे प्रत्यक्ष धडे देण्यात आले.
कार्यक्रमाचे उद्घाटन सरपंच उषाबाई रवींद्र पाटील यांच्या हस्ते झाले. यावेळी क्रांतीज्योती सावित्रीबाई फुले आणि राजमाता जिजाऊ यांच्या प्रतिमेचे पूजन करण्यात आले. ‘उमेद’ अभियानाच्या प्रार्थना गीताने कार्यक्रमाची मंगलमय सुरुवात झाली. कार्यक्रमाचे मुख्य मार्गदर्शक व ह्युमन डेव्हलपमेंट फाउंडेशनचे अध्यक्ष गोकुळ सोनार यांनी महिलांना उद्योजकतेचे महत्त्व पटवून दिले. उमेद अभियानाचे तालुका मॅनेजर (BMM) सूर्यप्रताप राऊत यांनी बचत गटांमार्फत राबवल्या जाणाऱ्या शासकीय योजनांची माहिती दिली. तसेच कुरंगी बांबरुड गण प्रमुख वसंत पाटील सर यांनी विभागातील यशस्वी बचत गट प्रकल्पांची उदाहरणे देऊन महिलांना प्रोत्साहित केले.
प्रशिक्षणाचे स्वरूप:
• दिवस १ (मसाला उद्योग) : प्रशिक्षक रुपाली अमृतकर यांनी मसाला उद्योगाची तांत्रिक माहिती दिली. यामध्ये मिरची, धने, हळद यांची निवड व प्रक्रिया शिकवण्यात आली. महिलांनी प्रत्यक्ष चहा मसाला, गरम मसाला आणि कांदा-लसूण मसाला तयार करण्याचे प्रात्यक्षिक केले.
• दिवस २ (केळी प्रक्रिया) : प्रशिक्षक कृष्णा बोरुडे यांनी केळी वेफर्स, केळीचे पीठ आणि मूल्यवर्धित उत्पादनांची माहिती दिली. अन्न सुरक्षा व स्वच्छता (FSSAI) नियमांचे महत्त्व यावेळी समजावून सांगण्यात आले.
• दिवस ३ (मार्केटिंग व पॅकेजिंग) : प्रशिक्षक प्रशांत साठे यांनी उत्पादनांचे ब्रँडिंग, आकर्षक पॅकेजिंग आणि सोशल मीडिया (व्हॉट्सॲप, फेसबुक) द्वारे मार्केटिंग करण्याचे तंत्र शिकवले.
समारोप व प्रमाणपत्र वाटप
समारोप प्रसंगी ग्रामपंचायत अधिकारी नंदकिशोर पाटील यांनी मुख्यमंत्री समृद्ध पंचायत राज अभियानाबद्दल माहिती दिली. या प्रसंगी भारती लक्ष्मण पाटील, आशा दिनेश पाटील, रेखा संदीप पाटील, स्नेहल अविनाश पाटील आणि मिनाबाई संजय बोरसे या प्रशिक्षणार्थी महिलांनी आपले मनोगत व्यक्त करताना प्रशिक्षणाबद्दल समाधान व्यक्त केले.
या कार्यक्रमाला उपसरपंच अशोक पाटील, सीआरपी माधुरी पाटील, किर्ती पाटील यांच्यासह सर्व ग्रामपंचायत सदस्य व अंगणवाडी सेविका उपस्थित होत्या. सूत्रसंचालन कृष्णा बोरुडे यांनी केले, तर आभार रुपाली अमृतकर यांनी मानले. यशस्वीतेसाठी किरण टेकम, विनोद पाटील व मदतनीसांनी परिश्रम घेतले.
