८ लाखांची रोकड हस्तगत; पोलीस अधीक्षकांची माहिती
जळगाव (प्रतिनिधी) : एमआयडीसी पोलीस स्टेशन हद्दीत काही दिवसांपूर्वी झालेल्या बॅग लिफ्टिंगच्या गंभीर गुन्ह्याचा छडा लावण्यात स्थानिक गुन्हे शाखेला (LCB) यश आले आहे. या कारवाईत पोलिसांनी दोन आरोपींना ताब्यात घेतले असून, फिर्यादीकडून हिसकावून नेलेली ८ लाख रुपयांची रोख रक्कम हस्तगत करण्यात आली आहे, अशी माहिती पोलीस अधीक्षक डॉ. महेश्वर रेड्डी यांनी बुधवारी आयोजित पत्रकार परिषदेत दिली.
पोलिसांनी दिलेल्या माहितीनुसार, शहरातील जुनी जोशी कॉलनी येथील विलास मधुकर जाधव (वय ६७) यांच्या तक्रारीनुसार, एमआयडीसी पोलीस स्टेशनमध्ये अज्ञात आरोपींविरुद्ध गुन्हा नोंद करण्यात आला होता. गुन्ह्याचे गांभीर्य लक्षात घेऊन पोलीस अधीक्षक डॉ. महेश्वर रेड्डी यांनी हा गुन्हा त्वरित उघडकीस आणण्याचे आदेश स्थानिक गुन्हे शाखेला दिले होते.
त्यानुसार, स्थानिक गुन्हे शाखेचे वरिष्ठ पोलीस निरीक्षक राहुल गायकवाड यांनी अधिकारी व अंमलदार यांचे विशेष पथक तयार केले. गुन्ह्याचा समांतर तपास व तांत्रिक विश्लेषण करत असताना, २३ नोव्हेंबर रोजी पथकाने गोपनीय माहितीच्या आधारे दोन आरोपींना ताब्यात घेतले. अटक करण्यात आलेल्या आरोपींमध्ये विजय शांताराम पाटील (वय ४१, रा. कलावसंत नगर, जळगाव) आणि जितेंद्र छोटुलाल जाधव (वय ४४, रा. ज्ञानदेव नगर, जुना खेडी रोड, जळगाव) यांचा समावेश आहे. या आरोपींकडून फिर्यादीकडून हिसकावलेली ८ लाख रुपये रोख रक्कम हस्तगत करण्यात आली.
यांनी केली कारवाई
पुढील तपासासाठी दोन्ही आरोपींना एमआयडीसी पोलिसांच्या ताब्यात देण्यात आले आहे. पोलीस अधीक्षक डॉ. महेश्वर रेड्डी, अपर पोलीस अधीक्षक अशोक नखाते आणि उपविभागीय पोलीस अधिकारी नितीन गणापुरे यांच्या मार्गदर्शनाखाली वरिष्ठ पोलीस निरीक्षक राहुल गायकवाड आणि त्यांच्या पथकातील पोलीस उपनिरीक्षक शरद बागल, सोपान गोरे, पोहेकॉ प्रविण भालेराव, मुरलीधर धनगर, सलीम तडवी, पोकॉ सिध्देश्वर डापकर, रतनहरी गिते, मयुर निकम, सचिन घुगे, प्रदीप सपकाळे यांच्यासह तसेच नेत्रम येथील पोकों पंकज खडसे, पोकॉ मुबारक देशमुख, पोकों कुंदनसिंग बयास व सायबर येथील पोकों गौरव पाटील, मिलींद जाधव यांनी ही उल्लेखनीय कामगिरी केली.
