रावेर येथे ‘महाविकास आघाडी’कडून मनीषाताई रविंद्र पवार नगराध्यक्ष पदाच्या उमेदवार!
‘अजितदादा’ गटाकडून पाठिंबा जाहीर ; कार्यकर्त्यांमध्ये उत्सवाचे वातावरण
रावेर (प्रतिनिधी) : रावेर नगरपरिषदेच्या निवडणुकीच्या रणधुमाळीत ‘महाविकास आघाडी’ने आपली संघटनात्मक आणि राजकीय ताकद पुन्हा एकदा सिद्ध केली आहे. शहराच्या सर्वांगीण विकासाला नवी गती देण्याच्या निर्धाराने, ‘महाविकास आघाडी पक्षा’ने नगराध्यक्ष पदासाठी शिवसेना पक्षाचे (उद्धव बाळासाहेब ठाकरे गट) विधानसभा क्षेत्र प्रमुख रविंद्र राजाराम पवार यांच्या पत्नी मनीषाताई रविंद्र पवार यांच्या नावावर शिक्कामोर्तब केले आहे.
तसेच मनीषाताईंना राष्ट्रवादी काँग्रेस (अजितदादा गट) पक्षाकडून पाठिंबा जाहीर करण्यात आला आहे. लोकप्रिय आणि कार्यकर्त्यांच्या मजबूत पाठबळावर विश्वास असलेले उमेदवार निवडणुकीच्या रिंगणात उतरवल्यामुळे कार्यकर्त्यांमध्ये उत्सवाचे वातावरण निर्माण झाले आहे.
महाविकास आघाडीच्या प्रचारास वेग
रावेर नगरपरिषद सार्वत्रिक निवडणुकीत महाविकास आघाडीच्या प्रचाराला वेग आला असून महा विकास आघाडीचा ‘उबाठा’ या घटक पक्षाच्या नगराध्यक्षपदाच्या उमेदवार मनीषा पवार आणि विविध प्रभागातील आघाडीच्या उमेदवारांनी प्रचारात प्रभावी पकड निर्माण केली आहे. मतदारांमध्ये वाढता प्रतिसाद आणि घराघर संपर्कामुळे आघाडीच्या पथकाने निवडणूक मैदानात मोठी आघाडी घेतल्याचे दिसून येत आहे.
रावेर शहराचे भविष्य उजळेल – मनीषा पवार
उच्चशिक्षित असलेल्या नगराध्यक्षपदाच्या उमेदवार मनीषाताई पवार यांचे शैक्षणिक क्षेत्रासह विविध क्षेत्रात सक्रिय सहभाग आहे. त्यांच्या मोठा जनसंपर्क असून रावेर शहरातील अतिक्रमण, रस्ते, गटारी, स्वच्छता अशा अनेक मूलभूत समस्या प्राधान्याने सोडविण्याचे त्यांचे व्हिजन आहे. एकनिष्ठ व सामाजिक कार्यात त्यांच्या योगदानामुळे रावेर शहराचे भविष्य उजळेल, अशा विश्वासही मनीषा पवार यांनी प्रचारादरम्यान व्यक्त केला आहे.
