प्रवाशांची लुट करणारे चौघे ४ तासात जेरबंद!
धरणगाव पोलिसांची मोठी कारवाई
जळगाव (प्रतिनिधी) : धरणगाव-जळगाव रोडवर मुसळी फाट्याजवळ बुधवारी रात्री ११.३० वाजेच्या सुमारास कार अडवून तिघांना मारहाण करून ३० हजार लुटणाऱ्या चारही आरोपींना धरणगाव पोलिसांनी अवघ्या चार तासांत अटक केली आहे. पोलिसांनी आरोपींकडून गुन्ह्यात वापरलेली कार आणि लुटलेली रोकड हस्तगत करण्यात यश मिळवले आहे.
पोलिसांनी दिलेल्या माहितीनुसार, धनंजय शंकर पाटील (रा. खोडांमळी, नंदुरबार) हे बुधवारी १२ नोव्हेंबर रोजी रात्री खामगाव येथील काम संपवून ठेकेदार आणि कामगारांसह त्यांच्या इसुझु कॅम्पर गाडीतून जात होते. मुसळी फाट्याजवळील हॉटेल अर्जुना येथे जेवण करून पुढे जात असताना, रात्री सव्वा अकरा वाजेच्या सुमारास मुसळी गावाजवळ पांढऱ्या रंगाच्या ह्युंडाई कारमधून (क्र. MH14 LX 8515) आलेल्या चार अज्ञात इसमांनी त्यांची गाडी आडवी लावली.
या हल्लेखोरांनी पाटील आणि त्यांच्या सहकाऱ्यांना मारहाण करून ठेकेदार शंकर बामनी यांच्या खिशातून ३० हजार रूपयांची रोकड जबरदस्तीने काढून पळ काढला होता. घटनेची माहिती मिळताच, रात्रगस्तीवर असलेले पोलीस निरीक्षक सुनील पवार यांनी सहायक पोलीस निरीक्षक प्रशांत कंडारे व त्यांच्या पथकासह तात्काळ तपासाची चक्रे फिरवली. तक्रारदाराने दिलेल्या माहितीच्या आधारे पोलिसांनी गुप्त माहिती काढून सुनिल अशोक कु-हाडे (वय-21) आणि विजय मेवालाल मोहीते (वय-25) यांना ताब्यात घेतले. या दोघांच्या चौकशीतून गणेश लक्ष्मण अहीरे (वय-21) आणि कृष्णा अशोक राठोड (वय-21) यांची नावे समोर आली. पोलिसांनी या चौघांनाही पहाटे ५.३० वाजता अटक करण्यात आली. त्यांच्याकडून गुन्ह्यात वापरलेली कार आणि लुटलेले २९ हजार ७०० रूपये जप्त करण्यात आले आहेत. या आरोपींविरुद्ध धरणगाव पोलीस स्टेशनमध्ये गुन्हा दाखल करण्यात आला असून, पुढील तपास पाळधी दूरक्षेत्राचे सहायक पोलीस निरीक्षक प्रशांत कंडारे हे करत आहेत.
