वरणगाव शहरातून दोन गावठी पिस्तूल आणि एक जिवंत काडतूससह सराईत गुन्हेगार ताब्यात
जळगाव (प्रतिनिधी) : सण-उत्सव आणि स्थानिक स्वराज्य संस्था निवडणुकांच्या पार्श्वभूमीवर जिल्ह्यात शांतता आणि कायदा सुव्यवस्था अबाधित राहावी, यासाठी जळगाव पोलिसांकडून धडाकेबाज कारवाया सुरू असून, अशाच एका कारवाईत वरणगाव शहरातून दोन गावठी पिस्तूल आणि एक जिवंत काडतूससह सराईत गुन्हेगारास अटक करण्यात आली आहे. आरोपीविरुद्ध यापूर्वीही शस्त्रबंदी कायद्यानुसार गुन्हे दाखल आहेत.
८ ऑक्टोबर २०२५ रोजी जिल्हा पोलीस अधीक्षक डॉ. महेश्वर रेड्डी यांनी शस्त्रसाठा व गुन्हेगारी नियंत्रणासाठी विशेष सूचना वरिष्ठ पोलीस निरीक्षक राहुल गायकवाड (स्थानीय गुन्हे शाखा, जळगाव) यांना दिल्या होत्या. त्यानुसार, त्यांना मिळालेल्या गुप्त माहितीच्या आधारे वरणगाव ऑर्डनन्स फॅक्टरी येथील राहणारा आणि आधीपासूनच रिकॉर्डवर असलेला आरोपी संजय गोपाळ चंडेले हा विनापरवाना शस्त्र बाळगून शहरात फिरत असल्याची माहिती मिळाली.
या माहितीच्या आधारे गुन्हे शाखेचे पथक तात्काळ सक्रिय झाले आणि वरणगाव शहरातील तिरंगा चौक परिसरात सापळा रचण्यात आला. रात्री ११.३० वाजेच्या सुमारास तिथे झाडाजवळ संशयित इसम उभा असल्याचे निदर्शनास आल्यानंतर पोलिसांनी त्याला अटक केली. विचारपूस केली असता त्याने आपले नाव संजय गोपाळ चंडेले (वय ५०, रा. दर्यापुर शिवार, वरणगाव ऑर्डनन्स फॅक्टरी) असल्याचे सांगितले.
त्यानंतर घेतलेल्या अंगझडतीत त्याच्याकडून ५०,५०० रुपये किमतीचे दोन गावठी पिस्तूल व एक जिवंत काडतूस जप्त करण्यात आले. त्यावर वरणगाव पोलीस स्टेशनमध्ये आर्म्स अॅक्ट ३/२५ अन्वये गुन्हा क्रमांक २१३/२०२५ नोंदवण्यात आला आहे. विशेष म्हणजे संजय चंडेले याच्यावर यापूर्वीही २०२२ मध्ये अशाच स्वरूपाचे दोन गुन्हे दाखल झाले आहेत.
ही कारवाई पोलीस अधीक्षक डॉ. महेश्वर रेड्डी, अप्पर पोलीस अधीक्षक अशोक नखाते, गुन्हे शाखेचे वरिष्ठ पोलीस निरीक्षक राहुल गायकवाड यांच्या मार्गदर्शनाखाली करण्यात आली. यामध्ये पो.उ.निरीक्षक शरद बागल, रवी नरवाडे, पोहेकॉ गोपाळ गव्हाळे, उमाकांत पाटील, पोना विकास सातदीवे, श्रीकृष्ण देशमुख, प्रशांत परदेशी, राहुल वानखेडे व भारत पाटील आदींचा समावेश होता.
