रिक्षाने दिली जोरदार धडक; रूग्णालयात नातेवाईकांचा आक्रोश
जळगाव (प्रतिनिधी) : शहरातील ममता हॉस्पिटलजवळ खेळत असलेल्या ६ वर्षीय चिमुकलीला भरधाव वेगाने आलेल्या रिक्षाने जोरदार धडक दिली. या भीषण अपघातात तिचा जागीच मृत्यू झाला. ही दुर्दैवी घटना मंगळवारी, २६ ऑगस्ट रोजी दुपारच्या सुमारास घडली. या घटनेमुळे संपूर्ण परिसरात हळहळ व्यक्त होत असून रूग्णालय परिसरात नातेवाईकांनी मोठा आक्रोश केला.
मनीषा देवसिंग बारेला (वय ६) असे मृत बालिकेचे नाव आहे. मनीषा मूळची चोपडा तालुक्यातील नागलवाडी येथील असून, ते सध्या मेहरूण परिसरात वास्तव्यास होती. आई बांधकाम मजूर म्हणून काम करून आपल्या कुटुंबाचा उदरनिर्वाह चालवते. मनीषा ही पहिलीच्या वर्गात शिकत होती. अपघाताच्या वेळी तिची आई बांधकाम साईटवर काम करत होती, तर मनीषा तिच्या जवळच खेळत होती. अचानक ती रस्त्याजवळ गेली आणि भरधाव रिक्षाने तिला धडक दिली. धडकेमुळे तिच्या तोंडाला आणि पायाला जबर मार लागला.
रूग्णालयात नातेवाईकांचा आक्रोश
अपघातानंतर ठेकेदार अहमद खान यांनी तातडीने नागरिकांच्या मदतीने मनीषाला शासकीय वैद्यकीय महाविद्यालय आणि रुग्णालयात दाखल केले. मात्र, वैद्यकीय अधिकाऱ्यांनी तिला मृत घोषित केले. त्यावेळी रुग्णालयात आईने मोठा आक्रोश केला. मनीषाच्या वडिलांचाही पाच वर्षांपूर्वी बस अपघातात मृत्यू झाला होता. याप्रकरणी एमआयडीसी पोलीस ठाण्यात गुन्हा दाखल करण्याचे काम सुरू आहे.
