राज्यातील कंत्राटी कर्मचारी बेमुदत संपावर

जिल्ह्यात रुग्णांचे हाल; आरोग्य यंत्रना ढिसाळली

जळगाव (प्रतिनिधी) : राष्ट्रीय आरोग्य अभियानातील (NHM) कंत्राटी कर्मचाऱ्यांनी शासनात समावेशाची मागणी करत बेमुदत संप पुकारला आहे, ज्यामुळे आरोग्य यंत्रणा ढिसाळली असून रुग्णांचे प्रचंड हाल होत आहे. जिल्ह्यासह राज्यभरातील कर्मचारी २१ ऑगस्टपासून संपावर गेले असून या कर्मचाऱ्यांच्या मागण्यांमुळे आरोग्य सेवांवर मोठा परिणाम झाला आहे. याबाबत प्राथमिक आरोग्य केंद्र रांजणगाव, ता.चाळीसगाव येथील कार्यरत एएनएम/जीएनएम कर्मचाऱ्यांनी आरोग्य सहाय्यक यांना निवेदन दिले आहे.

जिल्हा रुग्णालय, प्राथमिक आरोग्य केंद्र, ग्रामीण रुग्णालय आदी उपकेंद्रांवरील कंत्राटी कर्मचाऱ्यांनी बेमुदत संपाचा पवित्रा घेतला आहे. २१ ऑगस्टपासून राज्यातील राष्ट्रीय आरोग्य योजनेअंतर्गत कंत्राटी कर्मचारी संपावर गेल्यामुळे आरोग्य यंत्रणा कमकुवत झाली आहे. यावर राज्य सरकारने काही तोडगा न काढल्यास सोमवार, २५ ऑगस्टपासून जळगाव जिल्ह्यातीलही कंत्राटी कर्मचारी संपावर जाणार आहेत.

रांजणगावला जीएनएम कर्मचाऱ्यांचे निवेदन
जळगाव जिल्ह्यातही बेमुदत संपाला पाठिंबा मिळत असून अनेक ठिकाणी कंत्राटी कर्मचारी संपावर गेले आहेत. यासंदर्भात चाळीसगाव येथील प्राथमिक आरोग्य केंद्र, रांजणगाव येथील आरोग्य सहाय्यक कैलास राठोड यांना एएनएम/जीएनएम कर्मचाऱ्यांनी निवेदन दिले आहे. या संपाचा परिणाम म्हणून आरोग्य यंत्रणा ढेपाळली असून, गावातील रुग्णांना उपचारांसाठी त्रास सहन करावा लागत आहे.

अशा आहेत मागण्या
राज्य सरकारने राष्ट्रीय आरोग्य योजनेअंतर्गत कंत्राटी कर्मचाऱ्यांना सरळसेवेत समावून घेण्याबाबत आदेश काढण्यात आला आहे. मात्र, याबाबत कुठलीही अंमलबजावनी न झाल्यामुळे राज्यात सुमारे ३४ हजार कंत्राटी कर्मचारी संपावर गेले आहेत. राष्ट्रीय आरोग्य अभियाना अंतर्गत कार्यरत कंत्राटी कर्मचाऱ्यांची शासन सेवेत समावेश करण्यात यावा या मुख्य मागणीसह समान काम – समान वेतन, वेतनवाढ याच्यासह विविध १८ मागण्या करण्यात आल्या आहेत.

जिल्ह्यात रुग्णांचे प्रचंड हाल
राज्यातील सार्वजनिक आरोग्य सुविधांमध्ये सेवा देणाऱ्या डॉक्टर, परिचारिका, फार्मासिस्ट, लॅब टेक्निशियन आणि इतर आरोग्य कर्मचाऱ्यांच्या संघटनांनी हा संप पुकारला आहे. त्यामुळे जिल्ह्यातील सर्व उपकेंद्र, जिल्हा रुग्णालय मधील रूग्णांचे प्रचंड हाल होत आहे. संपामुळे रुग्णांना उपचारासंबंधी विविध अडचणींचा सामना करावा लागत असून अनेक रुग्ण खासगी रुग्णालयात जावे लागत आहे. या मागण्या मान्य न झाल्यामुळे सोमवारपासून जिल्ह्यातील सर्व राष्ट्रीय आरोग्य योजनेअंतर्गत कार्यरत कंत्राटी कर्मचारी संपावर जाणार आहे.