आयशर वाहनासह ६१ गॅस सिलेंडर चोरी करणारे दोघे जेरबंद!
एमआयडीसी पोलिसांची मोठी कारवाई
जळगाव (प्रतिनिधी) : एमआयडीसी परिसरातून आयशर वाहनासह ६१ गॅस सिलेंडरची चोरी करणाऱ्या दोन आरोपींना एमआयडीसी पोलीस स्टेशनच्या स्थानिक गुन्हे शोध पथकाने मोठ्या शिताफीने जेरबंद केले आहे. त्यांच्याकडून चोरी केलेले १ लाख २२ हजार रुपयांचे ६१ गॅस सिलेंडर आणि गुन्ह्यात वापरलेले ५ लाख रुपये किमतीचे आयशर वाहन जप्त करण्यात आले आहे.
पोलिसांनी दिलेल्या माहितीनुसार, एमआयडीसी परिसरात १४ नोव्हेंबर रोजी रात्री भारत पेट्रोलियम, जळगाव येथून रिफिलिंग केलेले ३४२ गॅस सिलेंडर ट्रकमध्ये भरून पार्किंग केले होते. दुसऱ्या दिवशी सकाळी ट्रक रस्त्याच्या कडेला उभा होता, परंतु त्यातील तब्बल ६१ गॅस सिलेंडर गायब असल्याचे लक्षात आले. या प्रकरणी एमआयडीसी पोलीस स्टेशन येथे गुन्हा दाखल करण्यात आला होता.
दोघांनी चोरीची दिली कबुली
गुन्ह्याची गंभीरता लक्षात घेऊन एमआयडीसी पोलीस स्टेशनच्या गुन्हे शोध पथकाने तातडीने तपास सुरू केला. गुप्त माहितीच्या आधारे पोलिसांनी आरोपींची ओळख पटवली. त्यानुसार, दि. १८ नोव्हेंबर रोजी एमआयडीसी परिसरात सापळा रचून शेख फिरोज शेख याकुब (रा. नशिराबाद, जळगाव) याला ताब्यात घेण्यात आले. चौकशीदरम्यान, त्याने आपला साथीदार सैय्यद मुश्ताक सैय्यद अशपाक (रा. उस्मानिया पार्क, जळगाव) याच्यासोबत मिळून ही चोरी केल्याची कबुली दिली.
यांनी केली कारवाई
पोलिसांनी दोन्ही आरोपींकडून चोरीला गेलेले ६१ नग गॅस सिलेंडर (१,२२,०००/- रु.) आणि गुन्ह्यासाठी वापरण्यात आलेले आयशर वाहन (५,००,०००/- रु.) असा एकूण ६,२२,०००/- रुपयांचा मुद्देमाल हस्तगत केला आहे. पोलीस अधीक्षक डॉ. महेश्वर रेड्डी, अपर पोलीस अधीक्षक अशोक नखाते, आणि उपविभागीय पोलीस अधिकारी नितीन गणापुरे यांच्या मार्गदर्शनाखाली एमआयडीसी पोलीस स्टेशनचे पोलीस निरीक्षक बबन आव्हाड यांच्या सूचनेनुसार ही यशस्वी कामगिरी पार पडली. गुन्हे शोध पथकाचे पोउनि राहुल तायडे, पोउनि चंद्रकांत धनके, सफौ विजयसिंग पाटील, पोह गणेश शिरसाळे, प्रदीप चौधरी, गिरीश पाटील, प्रमोद लाडवंजारी, किरण चौधरी, नितीन ठाकुर, किरण पाटील, शशिकांत मराठे यांनी अत्यंत कौशल्यपूर्णरित्या तपास करून ही कारवाई पूर्ण केली.
