पालकमंत्री गुलाबराव पाटील यांच्याहस्ते १३ वातानुकूलित ‘शिवाई’ इलेक्ट्रिक बसचे लोकार्पण
मान्यवरांनी बसमध्ये प्रत्यक्ष बसून घेतला अनुभव; प्रवासाचा अनुभव अधिक सुखद व दर्जेदार ठरणार
जळगाव (प्रतिनिधी) : १३ वातानुकूलित ‘शिवाई’ इलेक्ट्रिक बसच्या लोकार्पण सोहळ्याचा थाटात कार्यक्रम जिल्ह्याचे पालकमंत्री गुलाबराव पाटील यांच्या हस्ते आज पार पडला. या लोकार्पण सोहळ्याला जिल्हाधिकारी डॉ. आयुष प्रसाद, जिल्हा परिषदेच्या मुख्य कार्यकारी अधिकारी मीनल करणवाल आणि आमदार सुरेश भोळे (राजू मामा) यांची प्रमुख उपस्थिती होती.
नवनवीन तंत्रज्ञानाच्या वापराने सार्वजनिक वाहतूक व्यवस्था अधिक सुलभ, पर्यावरणपूरक आणि प्रवाशांसाठी सोयीची व्हावी, या उद्देशाने ‘शिवाई’ इलेक्ट्रिक बस सेवा सुरू करण्यात आली आहे. या सर्व बस वातानुकूलित असून, प्रवाशांसाठी “पुष्पक सीट” नावाची आरामदायक व आलिशान आसनव्यवस्था देण्यात आली आहे. त्यामुळे प्रवासाचा अनुभव अधिक सुखद व दर्जेदार ठरणार आहे.
या बससेवेचा लोकार्पण सोहळा जळगाव शहरात मोठ्या उत्साहात पार पडला. यावेळी उपस्थित मान्यवरांनी बसमध्ये बसून प्रत्यक्ष अनुभव घेतला आणि प्रवासाच्या सोयींसंदर्भात माहिती घेतली. ‘शिवाई’ बस सेवा ही फक्त पर्यावरणपूरक पर्यायच नाही, तर ग्रामीण व शहरी भागातील प्रवाशांना एक नवी सुविधा देणारी क्रांतिकारी पायरी असल्याचे पालकमंत्री गुलाबराव पाटील यांनी सांगितले.
