इंटरस्कूल हॅकाथॉन 2025 मध्ये मॅक्रो व्हिजन अकॅडमी रावेर शाळेची उल्लेखनीय कामगिरी!
रावेर (प्रतिनिधी) : जळगाव येथील जी. एच. रायसोनी पब्लिक स्कूलतफे ७ नोव्हेंबर रोजी भव्य इंटरस्कूल हॅकाथॉन २०२५ चे आयोजन करण्यात आले. या स्पर्धेत इयत्ता ५ वी ते १२ वीपर्यंतच्या २० हून अधिक शाळांनी सहभाग नोंदवला. या स्पर्धेमध्ये मॅक्रो व्हिजन अकॅडमी, रावेर शाळेची उल्लेखनीय कामगिरी करीत लेव्हल 1 मध्ये प्रथम क्रमांक पटकावला.
या स्पर्धेचा उद्देश विद्यार्थ्यांमध्ये सर्जनशीलता, कोडिंग कौशल्य, समस्या सोडविण्याची क्षमता आणि ॲप डेव्हलपमेंट व ए.आय. चॅटबॉट्स विषयांबद्दलची आवड वाढविणे हा होता. मॅक्रो व्हिजन अकॅडमी, रावेर स्कूलच्या इयत्ता सहावी व इयत्ता सातवी च्या विद्यार्थ्यांनी या हॅकाथॉनमध्ये उत्साहाने भाग घेतला आणि आपल्या कल्पकतेचा उत्कृष्ट परिचय दिला. त्यात गट १ मध्ये इयत्ता सहावीतील गौरव जगदीश भोळे, आर्या प्रमोद चौधरी, काव्या दीपक पाटील या विद्यार्थ्यांनी लेव्हल 1 मध्ये उत्कृष्ट, उल्लेखनीय कामगिरी बजावून प्रथम क्रमांक पटकावला आहे.
या विद्यार्थ्यांनी आपली कल्पकता आणि तांत्रिक कौशल्य प्रभावीपणे सादर करत शाळेचा गौरव वाढविला. या यशामागे शाळेच्या संगणक शिक्षक अरविंद परदेशी यांचे मार्गदर्शन महत्त्वाचे ठरले. त्यांनी विद्यार्थ्यांना वेळोवेळी मार्गदर्शन करून त्यांच्याकडून सराव करून घेतला. त्यांच्या परिश्रमासोबत विद्यार्थ्यांची जिद्द आणि मेहनत यामुळे हा यशाचा मुकूट शक्य झाला. इयत्ता सातवीमधून नावे तीर्थ पाटील, ओम कुयटे, हार्दिक मालखेडे, यथार्थ सूरदास, फाल्गुनी महाजन, विधी पाटील यांनी सहभाग नोंदवला.
शाळेचे व्यवस्थापक किरण दुबे व शाळेचे मुख्याध्यापक जनार्दन धनगर यांनी विजेत्या विद्यार्थ्यांचे अभिनंदन करून त्यांच्या उज्ज्वल भविष्यासाठी शुभेच्छा दिल्या. तसेच शाळेचे चेअरमन श्रीराम पाटील, सेक्रेटरी स्वप्नील पाटील आणि जॉइंट सेक्रेटरी प्रमोद पाटील, शाळेच्या शैक्षणिक संचालिका वनिता पाटील यांनी विजेत्या विद्यार्थ्यांचे कौतुक व आनंद व्यक्त केला आहे. यांच्यासह शाळेचे उपाध्यक्ष ॲड. प्रवीण पासपोहे, खजिनदार विजय गोटीवांले, डायरेक्टर विनायक पाटील, धनराज चौधरी यांच्यासह शिक्षक वृंद व कर्मचारी वर्ग यांनीही विद्यार्थ्यांना शुभेच्छा दिल्या.
