जळगाव जिल्हा परिषदेतर्फे २०४ जोडप्यांना प्रोत्साहन अनुदान
जळगाव (प्रतिनिधी) : जिल्हा परिषदेच्या वतीने आंतरजातीय विवाह प्रोत्साहन योजना अंतर्गत जिल्हा परिषदेच्या मुख्य कार्यकारी अधिकारी श्रीमती मीनल करनवाल यांच्याहस्ते अनुदान वाटप समारंभ पार पडला. यावेळी त्यांनी आंतरजातीय विवाह करून सामाजिक समता प्रस्थापित करणाऱ्या या जोडप्यांचे अभिनंदन केले आणि त्यांच्या भावी आयुष्यासाठी शुभेच्छा दिल्या.
सामाजिक सलोखा आणि एकात्मता वाढवण्याच्या उद्देशाने जिल्हा परिषदेने यावर्षी एकूण २०४ जोडप्यांना प्रत्येकी रू. ५०,०००/- (पन्नास हजार रुपये) चे अनुदान प्रातिनिधिक स्वरुपात वाटप केले. सन २०२५-२६ च्या अर्थसंकल्पातील अनुदानातून या जोडप्यांना हा लाभ देण्यात आला आहे. या मदतीमुळे या जोडप्यांना आपले संसार सुरू करताना आर्थिक पाठबळ मिळणार आहे.
जिल्हा प्रशासनाचा नेहमीच सकारात्मक दृष्टिकोन
“आंतरजातीय विवाह करणाऱ्या नागरिकांप्रति जिल्हा प्रशासन नेहमीच सकारात्मक दृष्टिकोन ठेवील. हे केवळ अनुदान नसून, जातीय सलोख्याच्या दिशेने टाकलेले एक महत्त्वाचे पाऊल आहे,” असे मत मुख्य कार्यकारी अधिकारी मीनल करनवाल यांनी यावेळी बोलताना व्यक्त केले. या कार्यक्रमाला जिल्हा परिषदेचे अन्य पदाधिकारी, अधिकारी आणि मोठ्या संख्येने लाभार्थी जोडपी उपस्थित होती.
