जळगाव (प्रतिनिधी) : येथील रोटरी क्लब जळगाव, जळगाव जिल्हा विधी सेवा प्राधिकरण व एस. एस. मणियार विधी महाविद्यालयाच्या माध्यमातून नुकतेच न्यायालयात परिसरात पथनाट्याद्वारे कायदेविषयक जनजागृती करण्यात आली.
या प्रसंगी प्राधिकरणाचे सचिव पवन एच. बनसोड, प्राचार्य ॲड. बी. वाय. रेड्डी, सरकारी वकील सुरेंद्र काबरा, क्लब अध्यक्ष गिरीश कुळकर्णी, वकिल संघाचे अध्यक्ष ॲड. सागर चित्रे यांचेसह ॲड. महेश भोकरीकर, ॲड. श्रीकांत भुसारी, मानद सचिव सुभाष अमळनेरकर, संवाद सचिव पंकज व्यवहारे, डाॅ. शुभदा कुलकर्णी, सुबोध सराफ, ॲड. हेमंत भंगाळे, ॲड. आनंद मुजुमदार यासह अनेक मान्यवर, प्राध्यापक व विद्यार्थी मोठ्या संख्येने उपस्थित होते.
१८ वर्षांखालील मुलांचे लैंगिक अत्याचारांपासून संरक्षण करण्यासाठीचा पोक्सो कायदा, महिलांना शारीरिक मानसिक आर्थिक किंवा लैंगिक हिंसेपासून संरक्षण देण्यासाठीचा घरगुती हिंसाचार प्रतिबंधक कायदा, लग्नापूर्वी – लग्नात किंवा लग्नानंतर हुंडा मागणे, देणे किंवा घेणे हा गुन्हा ठरवणारा कायदा. कठोर शिक्षा व दंडाद्वारे हुंडा प्रथा रोखणे या उद्देशाने तयार करण्यात आलेला हुंडा प्रतिबंधक कायदा तसेच ज्येष्ठ नागरिक संरक्षण व कल्याण अधिनियम, २००७ अनुसार वयोवृद्ध पालक व ज्येष्ठ नागरिकांना भरण-पोषण, निवास, औषधोपचार आणि सुरक्षितता याची हमी देणारा कायदा, ज्येष्ठांना सन्मानाने, सुरक्षितपणे आणि स्वावलंबी जीवन जगता यावे या हेतूने निर्माण करण्यात आला आहे याची मणियार विधी महाविद्यालयातील विद्यार्थ्यांनी पथनाट्याद्वारे माहिती दिली.
पवन बनसोड यांनी कायदा क्षेत्रातील संधी व त्यात यशस्वी होण्यासाठी शुभेच्छा दिल्यात. प्रास्ताविक ॲड. महेश भोकरीकर यांनी तर गिरीश कुळकर्णी यांनी आभार मानले.
