सुपोषित जळगाव उपक्रमांतर्गत जिल्ह्यात सामूहिक सूर्यनमस्काराचे आयोजन
जळगाव (प्रतिनिधी) : यंग इंडिया फिट इंडिया या अभियानांतर्गत जिल्हा परिषदेच्या मुख्य कार्यकारी अधिकारी मिनल करनवाल यांच्या संकल्पनेतून राबविण्यात येत असलेल्या ‘सुपोषित जळगाव’ या विशेष उपक्रमाचा जिल्हाभर उत्स्फूर्त प्रतिसाद मिळत आहे. आरोग्याबाबत जनजागृती वाढविणे, कुपोषण निर्मूलन, तसेच नागरिकांना आरोग्यदायी जीवनशैलीची सवय लागावी यासाठी या मोहिमेअंतर्गत प्रत्येक आठवड्यात विविध आरोग्यविषयक कार्यक्रम आयोजित केले जातात.
या अनुषंगाने शनिवार, दि. १५ नोव्हेंबर रोजी जिल्हाभरातील सर्व प्राथमिक आरोग्य केंद्रांच्या कार्यक्षेत्रातील गावांमध्ये सामूहिक सूर्यनमस्कार हा उपक्रम भव्य प्रमाणात संपन्न झाला. या उपक्रमामध्ये जिल्ह्यातील विविध शाळांमधील विद्यार्थी, शिक्षक, पालक, ग्रामस्थ तसेच स्वयंसेवी संस्था उत्साहपूर्वक सहभागी झाल्या.
सूर्यनमस्काराच्या माध्यमातून शरीरातील लवचिकता वाढते, शारीरिक व मानसिक तंदुरुस्ती सुधारते तसेच सर्वांगीण आरोग्यास मोठ्या प्रमाणात लाभ होतो. या पार्श्वभूमीवर सुपोषित जळगाव मोहिमेअंतर्गत हा उपक्रम हाती घेण्यात आला.
उपक्रमाच्या यशस्वी आयोजनात जिल्ह्यातील सर्व प्राथमिक आरोग्य केंद्रांचे वैद्यकीय अधिकारी, समुदाय आरोग्य अधिकारी, आशा स्वयंसेविका व आरोग्य कर्मचारी यांनी सक्रिय सहभाग नोंदवला. प्रत्येक आरोग्य केंद्रात आरोग्यविषयक मार्गदर्शन, पोषणाचे महत्त्व, स्वच्छतेच्या सवयी, योग व व्यायामाचे फायदे याबाबत जनजागृतीही करण्यात आली.
सुपोषित जळगाव या मोहिमेंतर्गत दर शनिवारी विविध आरोग्य उपक्रम राबविण्यात येत असून नागरिकांनी या उपक्रमांना मिळणारा प्रतिसाद पाहता जिल्हा प्रशासनाकडून समाधान व्यक्त करण्यात येत आहे. मुख्य कार्यकारी अधिकारी मिनल करनवाल यांच्या मार्गदर्शनाखाली ही मोहीम अधिक प्रभावीपणे पुढे नेण्याचा मानस आहे.
