नगरपरिषद सार्वत्रिक निवडणूक संदर्भात आढावा बैठक

जळगाव (प्रतिनिधी) : नगरपरिषद सार्वत्रिक निवडणुकीच्या संदर्भात आज 8 नोव्हेंबर रोजी दुपारी १ वाजता जिल्हाधिकारी रोहन घुगे यांच्या अध्यक्षतेखाली दुरचित्रवाणी परिषद आयोजित करण्यात आली. “निवडणूक प्रक्रिया पारदर्शक, शांततामय व नियोजनबद्ध पद्धतीने पार पाडणे ही सर्वांची संयुक्त जबाबदारी आहे, असे निर्देश जिल्हाधिकारी रोहन घुगे यांनी दिले.

या बैठकीस सर्व निवडणुक निर्णय अधिकारी, सहायक निवडणुक निर्णय अधिकारी, नगरपरिषद / नगरपंचायत मुख्याधिकारी, तसेच उप विभागीय पोलीस अधिकारी आणि पोलीस निरीक्षक उपस्थित होते.

बैठकीत विविध प्रमुख मुद्दे असे
बैठकीत आदर्श आचारसंहिता पालनाविषयी मार्गदर्शन, मतदान यंत्र मागणी व साठवण व्यवस्था, छपाई व निवडणूक साहित्य व्यवस्थापन, नामनिर्देशन प्रक्रिया सराव व कार्यवाही, कर्मचारी नियुक्ती व प्रशिक्षणाचे नियोजन, राजकीय पक्षांच्या बैठका व समन्वय, पत्रकार परिषदांचे आयोजन करणे. यासह विविध परवानग्या व अनुमती प्रक्रिया, निवडणूक प्रशासन व पोलीस प्रशासन समन्वय, मतदान केंद्र तपासणी व स्वच्छता, कायद्याचे पालन व सुव्यवस्था राखणे, पारदर्शक व निष्पक्ष निवडणूक प्रक्रिया सुनिश्चित करणे आदी विषयांवर चर्चा करण्यात आली.

या बैठकीस पोलीस अधीक्षक डॉ. महेश्वर रेड्डी, उपजिल्हाधिकारी (म.प्र.) विजयकुमार ढगे व सहायक आयुक्त, नगरपालिका प्रशासन जनार्दन पवार यांच्यासह विविध विभागातील अधिकारी, पदाधिकारी उपस्थित होते.