केंद्रीय राज्यमंत्री श्रीमती रक्षाताई खडसे यांनी घेतली जामनेरला कार्यकर्त्यांची भेट
जामनेर-पाचोरा पीजे रेल्वे जमीन संपादनबाबत शेतकऱ्यांच्या समस्या घेतल्या जाणून
जळगाव (प्रतिनिधी) : जामनेर भाजपा कार्यालय येथे आज केंद्रीय राज्यमंत्री श्रीमती रक्षाताई खडसे यांनी भेट देऊन रावेर लोकसभा क्षेत्र अंतर्गत प्रगतीपथावर असलेल्या “पाचोरा-जामनेर” पीजे रेल्वे विस्तारीकरण प्रकल्पाच्या भूसंपादन बाबत जामनेर, पहूर व बोदवड परिसरातील प्रकल्पग्रस्त शेतकऱ्यांची बैठक घेऊन समस्या जाणून घेतल्या.
“पाचोरा-जामनेर-बोदवड” ब्रॉडगेज रेल्वे मार्गास “पीएम गतीशक्ती” योजनेंतर्गत ९५५ कोटी निधी मंजूर झालेला असून, सदर रेल्वे मार्गासाठी जमीन संपादन प्रक्रिया सुरु असून, विस्तारीकरण प्रकल्पाच्या भूसंपादनासाठी शासनामार्फत १०० कोटी निधी मंजूर करण्यात आलेला आहे.
भूसंपादन कायदा २००८ नुसार संपादन न होता भूसंपादन कायदा २०१३ नुसार संपादन मोबदला मिळावा अशी शेतकऱ्यांची मागणी असून, बाधित शेतकरी व स्थानिक नागरिकांच्या मागणीनुसार त्यांच्या समस्या व अडचणी सोडवून संपादन प्रक्रिया पूर्ण करण्यात येणार असून, येत्या ८ दिवसात रेल्वे बोर्ड अध्यक्ष यांची भेट घेऊन शेतकऱ्यांच्या समस्या सोडविण्यासाठी आपण प्रयत्नशील असल्याबाबत बाबत केंद्रीय राज्यमंत्री श्रीमती रक्षाताई खडसे यांनी शेतकऱ्यांना आश्वासन दिले.
