खतात विषारी घटक आढळल्याने खळबळ
रावेर (प्रतिनिधी): तालुक्यातील केळी, हळद व इतर पिकांसाठी वापरण्यात येणाऱ्या काही खतांमध्ये घातक रासायनिक घटक आढळून आल्याने शेतकरी वर्गात चिंतेचे वातावरण निर्माण झाले आहे. गुजरात येथून पुरवठा करण्यात आलेल्या बोगस खतांमध्ये विषारी पदार्थ असल्याचा प्राथमिक तपासात निष्कर्ष निघाला असून, जिल्हा कृषी विभागाने या प्रकरणाची गंभीर दखल घेत कारवाई सुरू केली आहे.
संबंधित खतांचे नमुने तपासणीसाठी प्रयोगशाळेत पाठविण्यात आले होते. तपासणीत काही खतांमध्ये मानवी व पिकांच्या आरोग्यास घातक असणारे घटक आढळून आल्याची माहिती पुढे आली आहे. या खतांच्या वापरामुळे पिकांच्या उत्पादनावर परिणाम होण्यासोबतच शेतकऱ्यांच्या आरोग्यालाही धोका निर्माण होऊ शकतो, अशी शक्यता कृषी अधिकाऱ्यांनी व्यक्त केली आहे.
जिल्हा कृषी विभागाने संबंधित विक्रेत्यांविरोधात कारवाई करत सदर खतांची विक्री थांबविण्याचे आदेश दिले आहेत. तसेच शेतकऱ्यांनी अशा संशयास्पद खतांचा वापर टाळावा व अधिकृत परवानाधारक विक्रेत्यांकडूनच खते व बियाणे खरेदी करावीत, असे आवाहन करण्यात आले आहे.
दरम्यान, या प्रकरणाचा अधिक तपास सुरू असून दोषी आढळणाऱ्यांविरोधात कठोर कारवाई करण्यात येणार असल्याचे कृषी विभागाकडून स्पष्ट करण्यात आले आहे.
