जळगाव, (प्रतिनिधी) : जिल्हा परिषदेच्या मुख्य कार्यकारी अधिकारी मिनल करनवाल यांच्या संकल्पनेतून राबविण्यात येत असलेल्या पंचायत समिती व ग्रामपंचायती सक्षमीकरण मोहिमेअंतर्गत, जामनेर नंतर आता एरंडोल पंचायत समितीनेही आयएसओ मानांकन मिळवून जिल्ह्यातील प्रशासनिक कार्यक्षमतेला नवे यश मिळवून दिले आहे.
या मोहिमेचा उद्देश म्हणजे ग्रामपंचायत व पंचायत समित्यांचे प्रशासन, सेवा सुविधा, पारदर्शकता व कामकाजातील गुणवत्तेला अधिक बळकटी देणे. या उपक्रमाअंतर्गत विविध निकषांवर आधारित मूल्यमापन करून आयएसओ मानांकनासाठी प्रयत्न सुरू होते.
जामनेर पंचायत समितीनंतर एरंडोल पंचायत समितीला मिळालेले आयएसओ मानांकन हे या उपक्रमाच्या यशस्वी अंमलबजावणीचे प्रतीक आहे. एरंडोल पंचायत समितीचे गट विकास अधिकारी डी. ई. जाधव यांनी हे मानांकन अधिकृतरित्या स्वीकारले.
मुख्य कार्यकारी अधिकारी श्रीमती मिनल करनवाल यांनी एरंडोल पंचायत समितीच्या संपूर्ण टीमचे अभिनंदन करत त्यांच्या प्रयत्नांची प्रशंसा केली आहे. त्यांनी सांगितले की, “ही फक्त सुरुवात आहे, जिल्ह्यातील इतर पंचायत समित्यांनाही याच धर्तीवर सक्षम करून आयएसओ मानांकनाच्या दिशेने मार्गदर्शन केले जाईल.”
