वेतनत्रुटी, कंत्राटी भरतीच्या निषेधार्थ सरकारी रुग्णालयात गुरुवारी कामबंद तर शुक्रवारपासून राज्यव्यापी बेमुदत बंद
जळगाव (प्रतिनिधी) : सातव्या वेतन आयोगातील परिचारिका संवर्गातील वेतनत्रुटी आणि कंत्राटी भरतीच्या विरोधात महाराष्ट्र राज्य परिचारिका संघटनेने (संलग्नित मुख्यालय लातूर) १५ व १६ जुलै रोजी आझाद मैदान, मुंबई येथे धरणे व निदर्शने १७ जुलैला एक दिवसाचे राज्यव्यापी कामबंद आंदोलन व याची दखल न घेतल्यास १८ जुलैपासून राज्यव्यापी बेमुदत कामबंद आंदोलन केले जाणार असल्याचा इशारा महाराष्ट्र राज्य परिचारिका संघटनेने दिला आहे. याबाबतचे पत्र संघटनेच्या वतीने शासकीय वैद्यकीय महाविद्यालय व रुग्णालयाचे अधिष्ठाता यांना देण्यात आले.
राज्यात सातवा वेतन आयोग लागू करण्यासाठी २०१७ साली बक्षी समिती गठीत करण्यात आली होती. बक्षी समितीसमोर महाराष्ट्र राज्य परिचारिका संघटना मुख्यालय लातूर संघटनेने राज्यातील परिचारिका संवर्गातील सर्व पदाच्या वेतन तफावत दूर करण्याची मागणी केली. बक्षी समितीने खंड २ प्रसिद्ध केल्यावर त्यात अधिपरिचारिका, परिसेविका, पाठयनिदर्शका, तसेच सार्वजनिक आरोग्य विभागातील बालरोग परिचारिका या पदावरील अन्याय दूर झाला नाही. याप्रकरणी न्यायालयात दाद मागण्यात आली. विविध संघटनांच्या न्यायालयीन प्रकरणामुळे पुन्हा मा. मुकेश खुल्लर यांची समिती गठीत केली. या समितीने देखील परिचारिकांची घोर निराशा केली.
तसेच वैद्यकीय शिक्षण विभागाने ६ जून रोजी परिचारिकांच्या कंत्राटी भरतीचा शासन निर्णय निर्गमित करण्यात आला. यास राज्यभरातून कडाडून विरोध करण्यात आला आणि शासन निर्णय रद्द करण्यात आला. राज्यात वाढत्या लोकसंखेनूसार १०० टक्के पद निर्मिती करणे, १०० टक्के पदोन्नतीसाठी संघटना शासनाकडे वारंवार पाठपुरावा करीत असून याकडे शासनाचे दुर्लक्ष झाल्याने परिचारिका संवर्गात संताप व्यक्त केला जात आहे. याचसाठी १५ व १६ जुलैपासून धरणे, १७ जुलै एक दिवस बेमुदत काम बंद आंदोलन, १८ जुलैपासून बेमुदत कामबंद आंदोलन केले जाणार असल्याची माहिती महाराष्ट्र राज्य परिचारिका संघटना (शासन मान्य) शाखा शासकीय वैद्यकीय महाविद्यालय व रुग्णालय, जळगावचे अध्यक्ष रुपाली पाटील, कार्याध्यक्ष नीता दुसाने, सचिव राजेश्वरी कोळी, खजिनदार अक्षय सपकाळे या पदाधिकाऱ्यांनी दिली आहे.
