जिल्हाधिकाऱ्यांनी घेतला महावितरणचा सविस्तर आढावा
जळगाव (प्रतिनिधी): जिल्ह्यातील वीजपुरवठा अधिक सक्षम, पारदर्शक आणि कार्यक्षम करण्याच्या दृष्टीने जिल्हाधिकारी रोहन घुगे यांच्या अध्यक्षतेखाली महावितरण विभागाची महत्त्वपूर्ण आढावा बैठक नुकतीच संपन्न झाली. या बैठकीत जिल्ह्यातील वीजविषयक प्रलंबित कामे तात्काळ पूर्ण करण्याचे निर्देश जिल्हाधिकाऱ्यांनी दिले आहेत.
जिल्हाधिकारी कार्यालयात आयोजित या बैठकीत महावितरणद्वारे राबविण्यात येणाऱ्या विविध शासकीय योजनांची सद्यस्थिती, अंमलबजावणीत येणाऱ्या तांत्रिक अडचणी आणि नवीन वीज जोडण्यांच्या प्रलंबित अर्जांवर सविस्तर चर्चा करण्यात आली. जिल्ह्यातील नागरिकांना सुरळीत, सुरक्षित आणि दर्जेदार वीजपुरवठा मिळावा, यासाठी देखभाल-दुरुस्तीची कामे वेळेत पूर्ण करण्यावर या बैठकीत विशेष भर देण्यात आला.
जिल्हाधिकाऱ्यांच्या दिल्या महत्त्वाच्या सूचना
सर्व प्रलंबित कामे प्राधान्याने आणि विहित वेळेत पूर्ण करावीत. ग्राहकांच्या तक्रारींचे निवारण जलद गतीने करून सेवा अधिक कार्यक्षम करावी. विविध वीज योजनांची प्रगती समाधानकारक असावी व त्याचा लाभ शेवटच्या घटकापर्यंत पोहोचावा. या बैठकीला महावितरणचे वरिष्ठ विभागीय अधिकारी आणि संबंधित कर्मचारी उपस्थित होते. जिल्ह्यातील वीज यंत्रणा अधिक सक्षम करण्यासाठी शासन स्तरावरून सर्वतोपरी प्रयत्न केले जातील, अशी ग्वाही यावेळी देण्यात आली.
