जळगाव (प्रतिनिधी) : मेडीको कप सिझन ५ स्पर्धेला यंदा भव्य प्रतिसाद मिळाला असून मुक्ताईनगर डॉक्टर असोसिएशनतर्फे आयोजित या राज्यस्तरीय क्रिकेट स्पर्धेत महाराष्ट्रातील तब्बल १४ संघांनी सहभाग नोंदवला. दि. २३ ते २५ नोव्हेंबरदरम्यान डे-नाईट स्वरूपात रोमांचक सामने पार पडले. क्वार्टर फायनलमध्ये गोदावरी सर्जिकल स्ट्रायकर संघाने युनिटी अकोला संघाचा ६ विकेटने पराभव करीत उपांत्य फेरीत प्रवेश केला. सेमीफायनलमध्ये मलकापूर विरुद्ध गोदावरी सर्जिकल स्ट्रायकरमध्ये सामना रंगला. यात गोदावरी संघाने ७ विकेटने विजय मिळवत थेट अंतिम फेरीत धडक मारली. दुसऱ्या उपांत्य सामन्यात मुक्ताईनगर संघाने श्रीराम अकोला संघावर मात केली.
अंतिम सामना : मुक्ताईनगर विरुद्ध गोदावरी सर्जिकल स्ट्रायकर
अंतिम लढतीत नाणेफेक जिंकत गोदावरी सर्जिकल स्ट्रायकरने मुक्ताईनगर संघाला फलंदाजीसाठी आमंत्रित केले. पहिल्या फलंदाजीमध्ये मुक्ताईनगर संघाने १० षटकांत ६७ धावांचे लक्ष्य ठेवले. लक्ष्याचा पाठलाग करताना गोदावरी संघाने ९ षटकांत ४ विकेट गमावत ६ विकेटने रोमांचक विजय मिळवला आणि दुसऱ्यांदा मेडिको कप आपल्या नावे केला.
व्यक्तिगत पुरस्कार :
- स्पर्धेतील उत्कृष्ट गोलंदाज म्हणून डॉ. सत्यम काळे यांची निवड झाली.
- स्पर्धेतील उत्कृष्ट फलंदाज म्हणून डॉ. रोहित भोसले यांना गौरविण्यात आले.
- संघाची कामगिरी
अंतिम सामन्यात कर्णधार डॉ. चैतन्य पाटील, उपकर्णधार डॉ. चैतन पाटील, विकेटकीपर डॉ. दीपक पाटील, तसेच डॉ. कमलाकर रेड्डी, डॉ. सौरभ माने, डॉ. सुशांत जाधव, डॉ. रोहित भोसले, डॉ. सत्यम काळे, डॉ. यश महाजन, डॉ. संतोष साबळे, डॉ. किशोर कदम, डॉ. कल्पेश पाटील, डॉ. अभिषेक कोलाल, डॉ. महेश जामखेडे यांनी उत्कृष्ट खेळ सादर केला. संघाचे प्रशिक्षक डॉ. तेजस झांबरे यांचे मार्गदर्शन विशेष ठरले.
- समारोप व सत्कार
समारोप प्रसंगी डॉ. विक्रांत जैस्वाल, डॉ. प्रविण पाचंपांडे, डॉ. निखील जैस्वाल यांच्या हस्ते विजेत्या संघाला पारितोषिक वितरण झाले. विजेत्या खेळाडूंचे संस्थाध्यक्ष माजी खासदार डॉ. उल्हास पाटील, अधिष्ठाता डॉ. प्रशांत सोळंके, प्रशासन अधिकारी प्रमोद भिरूड यांनी अभिनंदन केले. गोदावरी सर्जिकल स्ट्रायकर संघाने पुन्हा एकदा दमदार विजयासह राज्यस्तरीय क्रिकेटमध्ये आपले वर्चस्व सिद्ध केले.
