अद्ययावत तंत्रज्ञानाची १२८ स्लाईस सिटीस्कॅन मशीन ‘जीएमसी’मध्ये दाखल!
हृदयाची अँजिओग्राफी, अपघातातील गंभीर रुग्ण, कर्करोग, हृदयविकारांसाठी महत्वाचे
जळगाव (प्रतिनिधी) : येथील शासकीय वैद्यकीय महाविद्यालय व रुग्णालयात रेडिओलॉजी विभाग येथे अत्याधुनिक तंत्रज्ञानावर आधारित १२८ स्लाईस सिटीस्कॅन मशीन दाखल झाली आहे. शुक्रवारी दि. २८ नोव्हेंबर रोजी अधिष्ठाता डॉ. गिरीश ठाकूर यांच्या उपस्थितीत या मशीनद्वारे रुग्णांसाठी सेवा सुरू करण्यात आली. यावेळी रुग्णालयात हृदयाची पहिली अँजिओग्राफी झाली.
शासकीय वैद्यकीय महाविद्यालय व रुग्णालयात तरुणांसाठी आरोग्याच्या विविध सेवा सुविधा सुरू करण्यासाठी अधिष्ठाता डॉ. गिरीश ठाकुर यांच्या नेतृत्वाखाली सातत्याने प्रयत्न सुरू आहेत. त्याचाच एक भाग म्हणून सिटीस्कॅन विभागात ही मशीन दाखल झाली आहे. या मशीनची चाचणी झाल्यानंतर शुक्रवारी दिवसभरात ५ रुग्णांची तपासणी या मशिनद्वारे करण्यात आली. सुरुवातीला अधिष्ठाता डॉ. गिरीश ठाकुर यांना तंत्रज्ञ आणि डॉक्टर्स यांच्या टीमने सदर सेवेची पूर्ण माहिती दिली.
रुग्णाला मशीनवर घेण्यापासून त्याचा रिपोर्ट तयार करण्यापर्यंतची पूर्ण प्रक्रिया अधिष्ठाता डॉ. ठाकूर यांना दाखविली. या वेळेला उप अधिष्ठाता तथा रेडिओलॉजी विभागाचे प्रभारी प्रमुख डॉ. मारोती पोटे उपस्थित होते. ज्या रुग्णांना या मशिनद्वारे हृदयासंदर्भात तपासणी करायची असेल त्यांनी रुग्णालयामध्ये वैद्यकीय अधीक्षक कार्यालय किंवा कक्ष क्रमांक ११६ शल्य चिकित्सा विभाग येथे संपर्क साधावा असे आवाहन उप अधिष्ठाता डॉ. मारुती पोटे यांनी केले आहे. यावेळी रेडिओलॉजी विभागातील डॉ. वरूण निमजे, डॉ. कल्याणी बुरकुले, डॉ. पराग वाघ, शिवतेज देशमुख, प्रसन्न बऱ्हाटे, तंत्रज्ञ सूर्यकांत पाटील, सुशांत पिंपळे, संतोष पाटील, बालाजी सांगळे, कपिल महाले आदी उपस्थित होते.
“अत्याधुनिक १२८ स्लाईस सिटीस्कॅन” मशीनचा उपयोग
या मशीनमुळे अपघातात गंभीर जखमी झालेल्या रुग्णांना आधार मिळणार आहे. डोक्याला असलेली गंभीर ईजा, मेंदूचा मार, पोटाला व छातीला असलेला जबर मार या मशीनद्वारे तपासता येणार आहे. तसेच कर्करोगासाठी विविध निदान करण्यासाठी या मशीनचा उपयोग होईल. किडनी, यकृतचा आजार तसेच हृदयविकारातील विविध गुंतागुंती, रीजनल अंजॉग्राफी, व्हेनोग्राफी, अँजिओग्राफी यासाठी या मशीनचा उपयोग होईल. अचूक निदानासाठी रुग्णांना या मशीनद्वारे फायदा होणार आहे.
