जिल्ह्यात चोरट्यांचा धुमाकूळ; चार शाळांवर २ लाखांची रोकड लंपास!

जळगाव (प्रतिनिधी) : जळगाव जिल्ह्यात दिवसेंदिवस चोरट्यांचा धुमाकूळ वाढत असून एकाच रात्रीतून चार शाळांमध्ये चोरी झाल्याची धक्कादायक घटना समोर आली आहे. मंगळवार दि.२५ ते २६ नोव्हेंबरच्या मध्यरात्री चोरट्यांनी सावखेडा शिवारात वर्धमान सीबीएससी स्कूल, जी.एस. रायसोनी पब्लिक स्कूल, शानबाग शाळा आणि गुरुकुल किड्स या चार शाळांमधून तब्बल १ लाख ९४ हजार रुपयांची रोकड चोरून नेली आहे.
या चारही शाळांमधील मुख्य दरवाजाचे कुलूप तोडून चोरटयांनी आत प्रवेश केला. शाळांच्या प्रशासकीय कार्यालयातील ड्रॉवरमधून सुमारे १ लाख ९४ हजार रुपयांची रोकड चोरून नेली आहे. ही घटना २६ रोजी सकाळी उघडकीस आली. या घटनेमुळे जळगाव शहरासह परिसरात भीतीचे वातावरण निर्माण झाले आहे.
गुन्हा दाखल
याप्रकरणी वर्धमान शाळेचे प्राचार्य आशिष अजमेरा यांनी दिलेल्या तक्रारीवरून जळगाव तालुका पोलीस ठाण्यात अज्ञात चोरट्यांविरुद्ध गुन्हा दाखल करण्यात आला आहे. पुढील तपास पोलीस उपनिरीक्षक श्यामकुमार मोरे करत आहे.



