जळगाव जिल्हा परिषदेत “आर्थिक नियोजन व गुंतवणूक मार्गदर्शन” कार्यशाळेचे आयोजन
जळगाव (प्रतिनिधी) : वाढत्या महागाईच्या काळात योग्य आर्थिक नियोजन, सुयोग्य गुंतवणूक व आर्थिक सुरक्षितता याबाबत जागरूकता निर्माण करण्याच्या उद्देशाने जिल्हा परिषदेच्या मुख्य कार्यकारी अधिकारी मिनल करनवाल यांच्या संकल्पनेतून जिल्हा परिषदेच्या कर्मचारी वर्गासाठी विशेष मार्गदर्शन कार्यशाळेचे आयोजन करण्यात आले. ही कार्यशाळा बुधवार, दि. २६ नोव्हेंबर रोजी जिल्हा परिषदेच्या शाहू महाराज सभागृहात एन जे वेल्थ संस्थेच्या माध्यमातून पार पडली.
मुख्य कार्यकारी अधिकारी मिनल करनवाल यांच्या उपस्थितीत आयोजित या कार्यशाळेत आकांक्षा विवेक पारख तसेच अहिल्यानगर येथील सचिन राणे यांनी कर्मचाऱ्यांना आर्थिक नियोजनाचे महत्त्व, योग्य गुंतवणुकीचे विविध पर्याय, सुरक्षित व विश्वासार्ह गुंतवणूक मार्ग याबाबत सविस्तर मार्गदर्शन केले.
अलीकडच्या महागाईच्या वातावरणात वेळेवर व योग्य पद्धतीने गुंतवणूक न केल्यास आर्थिक संकटांची शक्यता वाढत असल्याचे मार्गदर्शकांनी स्पष्ट केले. आज उपलब्ध असलेल्या विविध गुंतवणूक व्यासपीठांपैकी विश्वासार्ह, पारदर्शक आणि दीर्घकालीन फायद्याच्या पर्यायांची निवड का आणि कशी करावी याची माहितीही या कार्यशाळेत देण्यात आली.
जिल्हा परिषदेच्या कर्मचाऱ्यांनी या उपयुक्त कार्यशाळेला उत्स्फूर्त प्रतिसाद दिला. आर्थिक शिस्त, बचत, जोखमीचे व्यवस्थापन व भविष्यकालीन गरजांनुसार गुंतवणूक करण्याचे महत्त्व उपस्थितांना पटवून देण्यात आले.
