मतदान केंद्रांवर १०० टक्के मूलभूत सुविधा मिळाव्यात

निवडणुकीच्या पाश्ववभूमीवर जिल्हाधिकारी रोहन घुगे यांच्या सूचना

जळगाव (प्रतिनिधी) : जळगाव जिल्ह्यातील नगरपालिका व नगर पंचायत सार्वत्रिक निवडणुकीसाठीची तयारी जोरात सुरू असून, मतदानाच्या दिवशी प्रत्येक मतदाराला सुकर, सुरक्षित आणि सुसज्ज मतदानाचा अनुभव मिळावा यावर प्रशासनाचा भर आहे. त्यानुसार जिल्हाधिकारी रोहन घुगे यांनी सर्व नगरपालिका क्षेत्रांतील मतदान केंद्रांवर आवश्यक मूलभूत सुविधा शंभर टक्के उपलब्ध करून देण्याच्या स्पष्ट सूचना दिल्या आहेत.

जिल्हाधिकारी कार्यालयात झालेल्या जिल्हास्तरीय सनियंत्रण समितीच्या आढावा बैठकीत जिल्हाधिकारी घुगे यांनी निवडणुकीसंदर्भातील सर्व कामकाजाचे परीक्षण केले. बैठकीस जिल्हा परिषदेच्या मुख्य कार्यकारी अधिकारी मीनल करनवाल, उपविभागीय अधिकारी विनय गोसावी, सहआयुक्त नगर पालिका प्रशासन जर्नादन पवार आणि राज्य उत्पादन शुल्क विभागाचे अधीक्षक श्री. भुकन प्रत्यक्ष उपस्थित होते. तसेच सर्व नगरपरिषदेचे निवडणूक निर्णय अधिकारी आणि नगरपालिका मुख्याधिकारी दूरदृश्य प्रणालीद्वारे सहभागी झाले.

मतदान केंद्रांवर पिण्याचे पाणी, स्वच्छतागृह, दिव्यांग मतदारांसाठी व्हीलचेअर यांसारख्या सुविधा अनिवार्यपणे उपलब्ध करून देण्याच्या सूचना जिल्हाधिकाऱ्यांनी दिल्या. आदर्श आचारसंहितेची प्रभावी अंमलबजावणी करण्यासाठी विविध पथके सक्रिय ठेवावीत, तसेच सर्व पथकांचे जीओ टॅग लोकेशन कार्यरत करावे, असेही त्यांनी स्पष्ट केले. संवेदनशील व अतिसंवेदनशील मतदान केंद्रांच्या परिसरात पुरेसा पोलिस बंदोबस्त ठेवण्याचे निर्देशही त्यांनी दिले.

एकखिडकी प्रणाली पर्याप्त मनुष्यबळासह कार्यान्वित ठेवावी आणि स्थानिक स्तरीय मीडिया कक्षामार्फत पत्रकारांना निवडणूक विषयक माहिती वेळोवेळी पुरवली जावी, असे ते म्हणाले. मतदानात वाढ होण्यासाठी स्वीप कार्यक्रमांतर्गत मतदार जागृतीसाठी विविध उपक्रम राबवावेत, असेही त्यांनी सुचविले.

यादरम्यान निवडणूक प्रक्रियेतील महत्त्वाच्या बाबींचा जिल्हाधिकाऱ्यांनी तपशीलवार आढावा घेतला. यात टपाली मतपत्रिका, मतपत्रिकांची छपाई, स्ट्रॉंग रूम व्यवस्थापन, EVM सेटिंग व सीलिंग, CU-BU ची तपासणी (FLC), मतदान साहित्याची उपलब्धता, कायदा व सुव्यवस्था, आठवडी बाजार बंदचे नियोजन, क्षेत्रीय अधिकाऱ्यांना दंडाधिकारी अधिकार देणे, शस्त्र जमा प्रक्रिया, विविध परवानग्यांची पूर्तता, दारूबंदीची अंमलबजावणी, निवडणूक खर्च तपासणी, स्टार प्रचारकांचे नियमन, मतमोजणीचे नियोजन व प्रशिक्षण, वाहतूक आराखडा तयार करणे यांचा समावेश होता.

जिल्हाधिकारी घुगे यांनी स्पष्ट केले की संपूर्ण निवडणूक प्रक्रिया काटेकोर, पारदर्शक आणि मतदारहिताची असावी यासाठी प्रत्येक अधिकाऱ्याने जबाबदारीने काम करणे अत्यावश्यक आहे.