शिरसाळा मारुतीचे दर्शनासाठी जातांना झाला अपघात
जळगाव (प्रतिनिधी) : जिल्ह्यात प्रसिद्ध धार्मिक स्थळांपैकी एक असलेल्या शिरसाळा मारुतीचे दर्शन करण्यासाठी जात असताना त्यांच्या दुचाकीला अज्ञात वाहनाने दिलेल्या धडकेत सख्खे चुलत भावांचा दुर्दैवी मृत्यू झाला आहे. हा अपघात शनिवारी पहाटे वाडी किल्ल्याजवळ झाला. या घटनेत कल्पेश समाधान माळी (वय १७) व शुभम भिका माळी (वय २१) दोघे रा. पाळधी (ता. जामनेर) या दोघांचा मृत्यू झाला आहे.
शनिवारी पहाटे चार वाजता पाळधीवरून कल्पेश व शुभम हे दोघे मारुती रायाचे दर्शनासाठी शिरसाळ्याकडे जात होते. बोदवडमार्गे जात असताना मालदाभाडी–वाडी किल्ला परिसरात अज्ञात वाहनाने त्यांच्या दुचाकीला जोरदार धडक दिली. या अपघातात दोघेही रस्त्याच्या कडील खोल नालीत पडले. गळा व डोक्याला गंभीर दुखापत झाल्याने त्यांचा घटनास्थळीच मृत्यू झाला.
सकाळी दर्शनासाठी गेलेले दोघे परत न आल्याने कुटुंबीयांनी शोध घेतला असता रस्त्याच्या कडेला दुचाकी पडलेली दिसली. पुढे पाहणी केली असता दोघेही मृत अवस्थेत आढळून आले. मृतदेह जामनेर उपजिल्हा रुग्णालयात शवविच्छेदनासाठी पाठविण्यात आले. या प्रकरणी जामनेर पोलिसांत गुन्हा दाखल असून पुढील तपास पोलीस उपनिरीक्षक किशोर पाटील करीत आहेत. सख्या चुलत भावांचा झालेल्या दुर्दैवी मृत्यूने पाळधी गावात शोककळा पसरली आहे.
