जळगाव (प्रतिनिधी) : आर्यन मॅन स्पर्धेसाठी योग्य प्रशिक्षणासह स्पर्धेदरम्यान मनावर नियंत्रण आणि सकारात्मक विचार असल्यास ही स्पर्धा अशक्य नाही असे आर्यन मॅन बहुमान विजेते सी.ए.प्रतीक मणियार यांनी प्रतिपादन केले. रोटरी क्लब ऑफ जळगाव इलाईट आणि रोटरी क्लब ऑफ जळगाव सेंट्रल यांच्या संयुक्त विद्यमाने मायादेवी नगरातील रोटरी भवन येथे आयोजित कार्यक्रमात ते बोलत होते.
यावेळी व्यासपीठावर रोटरी सेंट्रलचे अध्यक्ष जितेंद्र बरडे, मानद सचिव ॲड. केतन ढाके, रोटरी इलाईटचे अध्यक्ष संदीप झंवर, मानद सचिव हरगोविंद मणियार यांची प्रमुख उपस्थिती होती. मलेशिया येथे नुकत्याच झालेल्या आर्यन मॅन स्पर्धेत प्रतीक मणियार यांनी यश प्राप्त केल्याबद्दल रोटरीतर्फे त्यांच्या अनुभव कथनाचे आयोजन करण्यात आले होते. ३:८ किलोमीटर स्विमिंग, १८० किलो मीटर सायकलिंग आणि ४२:२ रनिंग या तीन प्रकारचा समावेश असलेल्या आर्यन मॅन स्पर्धेविषयी माहिती देत मणियार यांनी अनुभव कथन केले
नववर्षाचा संकल्प म्हणून २०२३ पासून फिटनेसकडे लक्ष म्हणून व्यायाम सुरू केला नंतर जळगाव रनर ग्रुपच्या सोबत रनिंगमुळे नवीन मित्रांसह एक दिशा मिळाली असे मणियार यांनी सांगून या प्रवासात योग्य प्रशिक्षक व योग्य प्रशिक्षण मिळाले आणि फिटनेस व आहार या गोष्टींवर लक्ष केंद्रित केले असे सांगून त्याचे महत्त्व त्यांनी सांगितले.
कोणतेही अशक्य वाटणारे ध्येय प्राप्त करण्यासाठी शिस्त, परिश्रम आणि सातत्य गरजेचे आहे.नकारात्मक विचार मनात येऊ न देता मनोधैर्य कायम टिकविले व व्यवस्थित पूर्वाअभ्यास केला तर या स्पर्धेत यश मिळविता येते असे सांगून मणियार यांनी सांगितले. स्पर्धेतील सहभागामुळे त्यांनी व्यावसायिक जीवनात व दैनंदिन कामात ऊर्जा मिळते, कार्यक्षमतेत वाढ होते व लक्ष केंद्रित होऊन यश प्राप्त होते असे सांगितले. शेवटी प्रश्न – उत्तरांच्या सत्रात श्रोत्यांच्या शंका निरसन केल्या. यावेळी प्रतीक मणियार यांना सन्मानपत्र देऊन गौरविण्यात आले. एस.आर. मणियार, मंजुश्री मणियार, प्राची मणियार यांचा महेंद्र रायसोनी, सहप्रांतपाल डॉ. अपर्णा भट – कासार, अनुश्री जखोटिया यांच्या हस्ते सत्कार करण्यात आला.
प्रास्ताविकात संदीप झंवर यांनी संपूर्ण जिल्ह्यासाठी पहिले आर्यन मॅन ठरलेले प्रतीक मणियार यांचे यश म्हणजे अभिमानाची गोष्ट आहे असे सांगितले. परिचय डॉ. विशाल जैन यांनी करून दिला, तर मनोगत व्यक्त करून जितेंद्र बरडे यांनी आभार मानले.
