जामनेर, भुसावळ, सावदा येथील भाजपचे तिघे उमेदवार बिनविरोध!
लोकनियुक्त नगराध्यक्ष पदांसाठी 242 अर्ज प्राप्त
जळगाव (प्रतिनिधी) : जळगाव जिल्ह्यातील नगरपरिषद आणि नगरपंचायत निवडणुकांच्या छाननी प्रक्रियेला सुरुवात झाली असून जामनेर, भुसावळ आणि सावदा येथे भाजपचे तीन उमेदवार बिनविरोध निवडून आले आहेत. याबाबत अधिकृत घोषणा मात्र माघारीची अंतिम मुदत संपल्यानंतर करण्यात येणार आहे.
जिल्ह्यातील 18 नगरपरिषद व नगरपंचायतींसाठी नगरसेवक पदांचे तब्बल 3,835 अर्ज दाखल झाले आहेत. लोकनियुक्त नगराध्यक्ष पदांसाठी 242 अर्ज आले आहेत. मंगळवार (दि.18) रोजी सकाळी दहापासून तालुकास्तरावर छाननीला सुरुवात करण्यात आली.
कार्यकर्त्यांमध्ये जल्लोष
भुसावळ येथे प्रभाग 7 ब मधील प्रीती मुकेश पाटील, सावदा येथील प्रभाग 7 मधील रंजना भारंबे आणि जामनेर येथील प्रभाग 11 ब मधील उज्वला दीपक तायडे हे भाजप उमेदवार बिनविरोध ठरले. यामुळे सावदा, भुसावळ व जामनेर येथे भाजप कार्यकर्ते मोठा जल्लोष करीत आहे. याबाबत अधिकृत घोषणा मात्र माघारीची अंतिम मुदत संपल्यानंतर करण्यात येणार आहे.
दरम्यान, यावल आणि भुसावळ येथील अनेक उमेदवारांवर हरकती दाखल झाल्या आहेत. काही ठिकाणी सुनावण्या सुरू असून काही ठिकाणी छाननीनंतर सुनावण्या घेण्यात येणार आहेत. यावलमध्ये उद्धव बाळासाहेब ठाकरे गटाच्या नगराध्यक्ष व नगरसेवक पदाच्या उमेदवारांवर भाजपाकडून हरकती नोंदवल्या गेल्या आहेत.
