जिल्ह्यात २ डिसेंबर रोजी मतदान; आजपासून नामनिर्देशन अर्जास सुरुवात

जिल्हा प्रशासन सज्ज; जिल्हाधिकारी रोहन घुगे यांची माहिती

जळगाव (प्रतिनिधी) : जिल्ह्यातील १८ नगरपरिषद आणि नगरपंचायतींसाठी जिल्ह्यात २ डिसेंबर रोजी मतदान होणार असून आज दि. १० नोव्हेंबरपासून नामनिर्देशन अर्ज दाखल करण्याची प्रक्रियेला सुरुवात झाली आहे. या निवडणुकीसाठी जिल्हा प्रशासनाने सर्व तयारी पूर्ण झालेले आहे, अशी माहिती जिल्हाधिकारी रोहन घुगे यांनी दिली.

या निवडणुकीत जिल्ह्यातील ४६४ नगरसेवक निवडले जाणार असून, ९७७ मतदान केंद्रांवर मतदान होणार आहे. जिल्ह्यातील १६ नगरपरिषद आणि २ नगरपंचायतींसाठी निवडणुक होणार असून ४ लाख ५० हजार ८९३ पुरुष, ४ लाख ३८ हजार ९३८ महिला व ८३ इतर मतदार असे एकूण ८ लाख ८९ हजार ९१४ मतदार मतदान करणार आहेत. जिल्ह्यातील मतदार याद्यांमध्ये सुमारे ३० हजार दुबार नावे आढळली असून अशा मतदारांकडून फक्त एका ठिकाणी मतदान करण्याचे हमीपत्र घेतले जाणार आहे.

जिल्ह्यात एक सदस्यीय ३४, दोन सदस्यीय २०६ आणि तीन सदस्यीय ६ प्रभागांमध्ये निवडणूक होणार असून, भुसावळ नगरपरिषद ‘अ’ वर्गात, तर अमळनेर, चाळीसगाव, चोपडा, जामनेर, पाचोरा या ‘ब’ वर्गात, तसेच धरणगाव, सावदा, रावेर, एरंडोल, फैजपूर, यावल, नशिराबाद, वरणगाव, पारोळा आणि भडगाव या नगरपरिषद ‘क’ वर्गात मोडतात. याशिवाय शेंदुर्णी व मुक्ताईनगर नगरपंचायतींसाठीही मतदान होणार आहे. निवडणुकीत मतदारांना काही ठिकाणी एकापेक्षा अधिक मतांचा अधिकार असेल. चोपडा, यावल, वरणगाव, धरणगाव, एरंडोल व फैजपूर या सहा नगरपरिषदांमधील तीन सदस्यीय प्रभागांमध्ये मतदारांना नगरसेवक पदासाठी तीन आणि नगराध्यक्षपदासाठी एक असे चार मत देण्याचा अधिकार असेल.

फरार व सराईत गुन्हेगारांवर लक्ष
कायदा-सुव्यवस्था सुरळीत राखण्यासाठी पोलिस विभागाला सर्व आवश्यक प्रतिबंधात्मक उपाययोजना राबवण्याचे निर्देश देण्यात आले आहेत. संवेदनशील भागांमध्ये विशेष बंदोबस्त, गुन्हेगारांवर कारवाई, तसेच मद्य, पैसा आणि अन्य वस्तूंचे वितरण रोखण्यासाठी कडक पावले उचलली जाणार आहेत. फरार व सराईत गुन्हेगारांवर लक्ष ठेवून आवश्यक ती कारवाई करण्याचेही आदेश जिल्हाधिकारी घुगे यांनी दिले आहेत.

‘एकल खिडकी प्रणाली’ सुरू
मतदान अधिकाऱ्यांना व कर्मचाऱ्यांना दोन सत्रांमध्ये प्रशिक्षण दिले जाणार असून, प्रशिक्षणात ईव्हीएम हाताळणी, माँक पोल आणि मतमोजणी प्रक्रियेचे प्रात्यक्षिक दाखवले जाईल. याशिवाय ‘एकल खिडकी प्रणाली’ सुरू करून निवडणुकीशी संबंधित परवानग्या जलद आणि पारदर्शकपणे देण्याची व्यवस्था करण्यात आली आहे.

२ डिसेंबर रोजी मतदान
नामनिर्देशनपत्र दाखल करण्याची मुदत १० ते १७ नोव्हेंबर दरम्यान सकाळी ११ ते दुपारी ३ वाजेपर्यंत राहणार असून, अंतिम उमेदवारांची यादी २६ नोव्हेंबर रोजी प्रसिद्ध केली जाईल. मतदान २ डिसेंबर रोजी सकाळी ७.३० ते सायंकाळी ५.३० या वेळेत पार पडेल, तर मतमोजणी आणि निकाल जाहीर ३ डिसेंबर रोजी सकाळी १० वाजल्यापासून सुरू होणार आहे.