महिलांनी ऑनलाईन फसवणुकीपासून सावध राहावे!

सीईओ मिनल करनवाल यांचे महिलांना आवाहन; ऑनलाईन सतर्कता पंधरवाड्यास सुरुवात

जळगाव (प्रतिनिधी) : महिलांनी ऑनलाइन फसवणुकीपासून सुरक्षित रहावे व सतर्क रहावे. कुठल्याही अनोळखी मेसेज, लिंकला प्रतिसाद देऊ नये. मोबाईल वापरताना काळजीपूर्वक वापरावा. मोबाईलमध्ये आलेले पासवर्ड कोणालाही शेअर करू नये तसेच आर्थिक व्यवहार करताना सांभाळून करावेत. कुठल्याही एसएमएस ऑनलाइन लिंक याबाबत तात्काळ प्रतिसाद देऊ नये, त्याची शहानिशा करूनच त्याबाबत प्रतिसाद द्यावा. कोणत्याही अमिषाला बळी न पडता आपले बँकिंग व्यवहार सांभाळून करावेत, असे आवाहन जिल्हा परिषदेच्या मुख्य कार्यकारी अधिकारी मीनल करणवाल यांनी केले.

‘उमेद’ अंतर्गत महिला बचत गटांसाठी ‘ऑनलाईन सतर्कता पंधरवाडा’ राबवण्याचा अभिनव उपक्रम सीईओ मीनल करणवाल यांनी हाती घेतला आहे. त्याची सुरुवात आज जामनेर तालुक्यातील ‘उमेद’ अभियानातील कार्यरत महिला बचत गटांच्या समुदाय संसाधन व्यक्तीशी ऑनलाइन संवाद साधून झाली. या ऑनलाइन कार्यशाळेत श्रीमती करणवाल यांनी महिलांला मार्गदर्शन केले.

महिलांमध्ये ऑनलाइन फसवणुकीचे विविध प्रकार घडत असतात. त्यासंबंधी जाणीव जागृती होण्यासाठी जिल्हा परिषद जळगाव व जिल्हा ग्रामीण विकास यंत्रणा जळगाव यांच्या मार्गदर्शनाने महिलांमध्ये ऑनलाइन फ्रॉड व फसवणूक होऊ नये यासाठी सतर्कता पंधरवाडा राबविण्यात येत आहे.

ऑनलाइन कार्यशाळेसाठी प्रकल्प संचालक जिल्हा ग्रामीण विकास यंत्रणा राजू लोखंडे, लीड डिस्ट्रिक्ट बँक मॅनेजर सुनील कुमार दोहरे, जिल्हा अभियान व्यवस्थापक हरेश्वर भोई व तालुका अभियान व्यवस्थापक सर्व टीम ऑनलाईन उपस्थित होते.

जिल्ह्यात 33000 स्वयंसहायता समूह सक्रिय
‘उमेद’ अभियानाचे जिल्ह्यातील 2250 कार्यरत समुदाय संसाधन व्यक्ती अर्थात सीआरपी कार्यरत आहेत. जिल्ह्यात एकूण 67 प्रभाग संघ असून 1430 ग्राम संघातील एकूण 33000 स्वयंसहायता समूह सक्रिय आहेत. एका स्वयंसहाय्यता समूहामध्ये 10 महिला असे एकूण तीन लाख तीस हजार महिला जिल्ह्यात स्वयंसहायता समूहांमध्ये समाविष्ट आहेत.

तालुका निहाय नियोजन असे
दि. ११/११/२०२५- भडगांव, दि. १२/११/२०२५ -चोपडा, दि. १३/११/२०२५- मुक्ताईनगर, दि. १४/११/२०२५- धरणगांव, दि. १८/११/२०२५- पारोळा, दि. १९/११/२०२५ – जळगांव, दि. २०/११/२०२५ – अमळनेर, दि. २१/११/२०२५ – एरंडोल, दि. २५/११/२०२५ – भुसावळ, दि. २६/११/२०२५ – रावेर, दि. २७/११/२०२५ – पाचोरा, दि. २८/११/२०२५ – चाळीसगांव, दि. २९/११/२०२५ – यावल.