एकाचवेळी दोन्ही गुडघ्यांची मोफत सांधेरोपण शस्त्रक्रिया यशस्वी, प्रौढालाही मिळाला लाभ !

जळगावात शासकीय रुग्णालयामध्ये अस्थिव्यंगोपचार विभागाला यश

जळगाव (प्रतिनिधी) : येथील शासकीय वैद्यकीय महाविद्यालय व रुग्णालयातील अस्थिव्यंगोपचार विभागातर्फे २ रुग्णांवर मोफत कृत्रिम सांधे प्रत्यारोपण शस्त्रक्रिया यशस्वीपणे पार पडली. दोन्ही रुग्णांना अधिष्ठाता डॉ. गिरीश ठाकूर यांच्या उपस्थितीत रुग्णालयातून निरोप देण्यात आला.

जळगाव शहरातील कांचन नगरचे रहिवासी सुरेश मधुकर सोनार (वय ७१) आणि लता काशीराम पाटील (वय ६०, रा. पिंपळगाव चौखांबे ता. जामनेर) या दोन रुग्णांना गुडघ्याचे सांधे घासले गेल्यामुळे चालण्यास प्रचंड त्रास होत होता. त्यांना शासकीय वैद्यकीय महाविद्यालय व रुग्णालयात तपासणीसाठी आणले असता, शस्त्रक्रिया करण्याचा सल्ला देण्यात आला. यानंतर सुरेश सोनार यांच्या डाव्या गुडघ्याची तर लता पाटील यांच्या दोन्ही गुडघ्याची मोफत कृत्रिम सांधेरोपण शस्त्रक्रिया करण्यात आली.

महात्मा फुले जनआरोग्य योजनेतून मोफत उपचार
महात्मा फुले जनआरोग्य योजनेतून या रुग्णांवर उपचार झाले. विशेष म्हणजे, लता पाटील यांच्या दोन्ही गुडघ्यांची एकाच वेळी शस्त्रक्रिया पार पडली, हे अस्थिव्यंगोपचार विभागाचे मोठे यश आहे. मंगळवारी दि. ७ रोजी दोन्ही रुग्णांना रुग्णालयातून अधिष्ठाता डॉ. गिरीश ठाकूर यांचे हस्ते निरोप देण्यात आला. शस्त्रक्रियेसाठी अस्थिव्यंगोपचार विभागप्रमुख डॉ. राजकुमार सूर्यवंशी, सहयोगी प्रा. डॉ. राजेंद्र अग्रवाल, सहायक प्रा. पंकज घोगरे, सहा. प्रा. डॉ. सुमित पाटील, डॉ. विरेंद्र पाटील, डॉ. नितीन प्रजापती, डॉ. यश बोन्डे, डॉ. विशाल टापरे, डॉ. हनुमंत काळे, डॉ. तौसिफ़ सय्यद, डॉ. अमोल कुऱ्हे, डॉ. साईनाथ जगताप आदींनी परिश्रम घेतले.

“आमच्या कुटुंबाची परिस्थिती हलाखीची आहे. अनेक महिन्यांपासून चालताना गुडघेदुखीची समस्या जाणवत होती. शासकीय वैद्यकीय महाविद्यालयात मला सांधेरोपण शस्त्रक्रिया मोफत झाल्यामुळे दिलासा मिळाला आहे. “

• लता पाटील, जामनेर

“आयुष्यभर हार्डवर्क केल्यामुळे डाव्या पायावर लोड आला. त्यातून सांधे झिजले. आता सांधे प्रत्यारोपण करायचे असल्याने शासकीय वैद्यकीय महाविद्यालयात मोफत शस्त्रक्रिया झाल्याने दिलासा मिळाला.”

• सुरेश सोनार, जळगाव.

“जळगावच्या शासकीय वैद्यकीय महाविद्यालयामध्ये कृत्रिम सांधेरोपण शस्त्रक्रिया या मोफत केल्या जातात. याचा जळगावकरांनी लाभ घ्यावा. यापूर्वी तीन कृत्रिम सांधेरोपण शस्त्रक्रिया यशस्वीपणे पार पडले आहेत. सांधेरोपण शस्त्रक्रियासाठी अस्थिरोग विभागात ओपीडी काळात संपर्क साधावा, असे आवाहन आम्ही करीत आहोत.”

• डॉ. गिरीश ठाकूर, अधिष्ठाता.