मॅक्रो व्हिजन अकॅडमी, रावेरच्या विद्यार्थ्यांनी अंडर-14 क्रिकेट स्पर्धेतही मारली बाजी

व्हि.एस. नाईक कॉलेजच्या मैदानावर झालेल्या क्रिकेट स्पर्धेत अविस्मरणीय विजय
रावेर (प्रतिनिधी) : मॅक्रो व्हिजन अकॅडमी रावेर येथील अंडर-14 विद्यार्थ्यांनी जिल्हास्तरीय क्रिकेट स्पर्धेत पहिल्यांदाच जोरदार कामगिरी करत अविस्मरणीय विजय मिळवला आहे. ही स्पर्धा नुकतीच रावेर येथील व्हि.एस. नाईक कॉलेजच्या मैदानावर रंगली.
खेळाच्या प्रत्येक टप्प्यावर विद्यार्थ्यांनी अप्रतिम गोलंदाजी, धारदार फलंदाजी आणि जबरदस्त क्षेत्ररक्षण करून प्रेक्षकांची दाद मिळवली. सामन्याचा शेवट विजयी फटक्याने झाला आणि शाळेचे नाव संपूर्ण मैदानावर गौरवाने गाजले.
विद्यार्थ्यांना क्रिकेटच्या सर्व तंत्रांचा अभ्यास व सराव करून देण्यासाठी वेलनेस टीचर राहुल इंगळे सर यांनी विशेष मेहनत घेतली, तर मैदानावरच्या सरावाला आकार देण्यासाठी शाळेचे बस कंडक्टर महेंद्र पाटील यांनी मनापासून योगदान दिले. संघातील आत्मविश्वास वाढवण्यासाठी व जिंकण्याची वृत्ती रुजवण्यासाठी शाळेचे व्यवस्थापक किरण दुबे यांनी विशेष मार्गदर्शन केले.
हा विजय म्हणजे कठोर परिश्रम, सततचा सराव आणि संघभावना यांचे गोड फलित आहे. “प्रत्येक चेंडूला धैर्याने तोंड देत, प्रत्येक धाव जिद्दीने कमावत त्यांनी सिद्ध केलं की खरा खेळाडू तोच जो शेवटच्या क्षणापर्यंत लढतो.” या ऐतिहासिक विजयाबद्दल विजेत्या विद्यार्थ्यांचे कौतुक शाळेचे मुख्याध्यापक जनार्दन धनगर , शिक्षकवृंद, कर्मचारी वर्ग व पालक वर्ग या सर्वांनी एकमुखाने केले आहे.
शाळेचे चेअरमन श्रीराम पाटील, सेक्रेटरी स्वप्नील पाटील, जॉइंट सेक्रेटरी प्रमोद पाटील, शैक्षणिक संचालिका वनिता पाटील यांनी विद्यार्थ्यांचे अभिनंदन केले.
तसेच उपाध्यक्ष ॲड. प्रवीण पासपोहे, खजिनदार विजय गोटीवांले, डायरेक्टर विनायक पाटील, धनराज चौधरी यांनीही विद्यार्थ्यांचे कौतुक करून शुभेच्छा दिल्या. हा विजय फक्त क्रिकेटचा नाही, तर विद्यार्थ्यांच्या धाडसाचा, जिद्दीचा आणि उज्ज्वल भविष्यासाठीचा नवा अध्याय आहे.




