जळगाव (प्रतिनिधी )- डॉ. उल्हास पाटील फिजिओथेरपी महाविद्यालयात दोन दिवसीय कार्यशाळा नुकतीच यशस्वीरित्या पार पडली. क्षमता-आधारित फिजिओथेरपी शिक्षण अभ्यासक्रमाच्या अंमलबजावणीवर आधारित या कार्यशाळेचे मुख्य उद्दीष्ट विद्यार्थ्यांना आणि प्राध्यापकांना नव्या शैक्षणिक पद्धतींबद्दल माहिती देणे हे होते.
या कार्यशाळेचे सूत्रसंचालन डॉ. अभिजित सत्रालकर (पीटी), डॉ. नेहा इंगळे-चौधरी (पीटी), डॉ. अमित जयस्वाल (पीटी) आणि डॉ. अर्पिता राठोड (पीटी) यांनी केले. कार्यशाळेतील तज्ज्ञांनी क्षमता-आधारित शिक्षणाची भूमिका, त्याचे महत्त्व आणि महाराष्ट्र आरोग्य विज्ञान विद्यापीठाने (MUHS) तयार केलेल्या या अभ्यासक्रमाची प्रभावी अंमलबजावणी कशी करावी, याबाबत सविस्तर मार्गदर्शन केले. त्यांनी विद्यापीठाने दिलेल्या वेळापत्रकानुसार विविध विषयांवर मनोगत व्यक्त केले. यावेळी त्यांनी उपस्थितांच्या शंकांचे निरसन केले.
कार्यशाळेचे उद्घाटन डॉ. उल्हास पाटील कॉलेज ऑफ फिजिओथेरपीचे प्राचार्य डॉ. जयवंत नागुलकर (पीटी) यांच्या हस्ते झाले. डॉ. नागुलकर यांनी यावेळी मान्यवरांचे स्वागत केले आणि मार्गदर्शन करताना क्षमता-आधारित शिक्षणाच्या गरजेवर विशेष भर दिला. ही दोन दिवसीय कार्यशाळा अत्यंत संवादात्मक होती, ज्यामध्ये अनेक गट उपक्रमांचा समावेश होता, ज्यामुळे सहभागींना सक्रियपणे शिकण्याची संधी मिळाली.
कार्यक्रमाच्या शेवटी, सर्व तज्ज्ञांचा सत्कार करण्यात आला आणि कार्यशाळेत सहभागी झालेल्या सर्वांना प्रमाणपत्रे प्रदान करण्यात आली. कार्यशाळेचे सूत्रसंचालक म्हणून डॉ. आस्था पटेल (पीटी) आणि डॉ. महविश शेख (पीटी) यांनी उपस्थितांचे आभार मानले.
