चार महिन्यांपूर्वीच विवाह झालेल्या मयुरीची गळफास घेऊन आत्महत्या

जळगावात हृदयद्रावक घटना; नातेवाईकांचा प्रचंड आक्रोश

जळगाव (प्रतिनिधी) : देशासह महाराष्ट्रात सासरच्या जाचाला कंटाळून विवाहित महिलांच्या आत्महत्या होत असल्याच्या घटनांमध्ये दिवसेंदिवस वाढ होत असून अशीच एक घटना जळगावात घडली. चार महिन्यांपूर्वीच विवाह झालेल्या मयुरीने राहत्या घरात गळफास घेऊन आत्महत्या केल्याची हृदयद्रावक घटना बुधवारी उघडकीस आली आहे.

शहरातील सुंदरमोती नगरात राहणाऱ्या मयुरी गौरव ठोसर (वय २३) असे मृत महिलेचे नाव आहे. अवघ्या चार महिन्यांपूर्वीच विवाह झालेल्या मयुरीने राहत्या घरात गळफास घेऊन केल्याची घटना १० सप्टेंबर रोजी संध्याकाळी उघडकीस आली. मृत महिलेच्या नातेवाईकांनी तिच्या सासरच्या मंडळींवर गंभीर आरोप करण्यात येत आहे. आरोपींना अटक केल्याशिवाय मृतदेह स्वीकारणार नाही, असा पवित्रा घेत नातेवाईकांनी गुरूवारी सकाळी शासकीय वैद्यकीय महाविद्यालयात प्रचंड आक्रोश केला.

नातेवाईकांच्या म्हणण्यानुसार, बुलढाणा जिल्ह्यातील पडाळी येथील मूळ रहिवासी असलेल्या मयुरीचा विवाह १० मे रोजी जळगावातील गौरव ठोसरसोबत झाला होता. लग्नानंतर काही दिवसांतच तिचा छळ सुरू झाला. सासरच्या मंडळींकडून छोट्या-छोट्या गोष्टींवरून तिचा शारीरिक आणि मानसिक छळ केला जात होता. इतकंच नव्हे, तर तिच्याकडून पैशांची मागणीही केली जात होती. मयुरीचा पती गौरव हादेखील तिला शिवीगाळ आणि मारहाण करत असल्याचं तिच्या माहेरच्या नातेवाईकांनी सांगितलं. या त्रासाला कंटाळून मयुरीने तिच्या आई-वडिलांना ही गोष्ट सांगितली.

वाढदिवसासाठी माहेरून दिले पैसे
मयुरी हिचा 9 सप्टेंबरला वाढदिवस साजरा करण्यात आला, यासाठी माहेरुन पैसे देण्यात आले होते, अशी माहिती तिच्या भावाने दिली. तसेच मयुरीचा मोठा दीर गणेश ठोसर याचा घटस्फोट झालेला असून, तो मयुरीसोबत अश्लील वर्तन करत होता. याबाबत मयुरीने मला सांगितले, मात्र ती मस्करी करत असेल असं वाटलं. मात्र, त्याची वर्तणूक विचित्र असल्याचा आरोपही तिच्या भावाने केला आहे. वाढदिवसाच्या दुसऱ्याच दिवशी, १० सप्टेंबर रोजी दुपारी ४ वाजता, घरात कुणी नसताना मयुरीने गळफास घेऊन आपलं जीवन संपवलं. हा प्रकार उघडकीस आल्यानंतर तिला तातडीने शासकीय वैद्यकीय महाविद्यालयात दाखल करण्यात आलं, पण डॉक्टरांनी तिला मृत घोषित केलं.

या घटनेची माहिती मयुरीचे वडील भगवान बुडूकले यांना मिळताच, ते कुटुंबासह ११ सप्टेंबर रोजी जळगावात दाखल झाले. हॉस्पिटलमध्ये दाखल झाल्यावर मयुरीची आई, वडील आणि भाऊ यांनी प्रचंड आक्रोश केला. आपल्या मुलीने सासरच्या छळाला कंटाळून आत्महत्या केली असल्याचा आरोप करत त्यांनी पती, सासू, सासरे, दीर आणि नणंद यांच्यावर गुन्हा दाखल करून त्यांना अटक करण्याची मागणी केली. जोपर्यंत आरोपींना अटक केली जात नाही, तोपर्यंत मृतदेह स्वीकारणार नाही, असा ठाम पवित्रा त्यांनी घेतला आहे. या प्रकरणी जळगाव तालुका पोलीस स्टेशनला अकस्मात मृत्यूची नोंद करण्याचे काम सुरू होते.