किमान तिकीट आता ₹१७; पहिल्या टप्प्यात ₹१५ वरून वाढ
जळगाव (प्रतिनिधी): राज्य परिवहन महामंडळाने (एसटी) प्रवासी भाड्यात १३ टक्के वाढ करण्याचा निर्णय अंमलात आणला असून, सुधारित दर आजपासून लागू झाले आहेत. या निर्णयामुळे राज्यभरातील लाखो प्रवाशांच्या प्रवासखर्चात वाढ होणार आहे.
नवीन दरानुसार, एसटीच्या पहिल्या टप्प्यातील किमान तिकीट ₹१५ वरून ₹१७ करण्यात आले आहे. तसेच शिवनेरी बसचे किमान भाडे ₹२३.७३ वरून ₹३० करण्यात आले आहे. दरवाढीचा परिणाम सर्व प्रकारच्या एसटी सेवांवर होणार असून, रोज प्रवास करणाऱ्या प्रवाशांना याचा अतिरिक्त आर्थिक भार सहन करावा लागणार आहे.
महामंडळाच्या माहितीनुसार, इंधनाचे वाढते दर, देखभाल खर्च, सुटे भाग, कर्मचाऱ्यांवरील खर्च तसेच इतर प्रशासकीय खर्च लक्षात घेऊन हा निर्णय घेण्यात आला आहे. या प्रस्तावाला यापूर्वी झालेल्या बैठकीत मंजुरी देण्यात आली होती.
गेल्या वर्षाच्या तुलनेत तोटा वाढला
महामंडळाच्या आर्थिक अहवालानुसार, २०२४ या वर्षात एसटीचा तोटा ₹३.७१ इतका होता. तो २०२६ मध्ये वाढून ₹५.६१ वर पोहोचल्याचे नमूद करण्यात आले आहे. वाढत्या खर्चामुळे आर्थिक ताण वाढल्याने भाडेवाढ अपरिहार्य ठरल्याचे महामंडळाचे म्हणणे आहे.
पुढील वर्षीही दरवाढीची शक्यता
महामंडळाच्या नियमानुसार दरवर्षी १० टक्के भाडेवाढ करण्याचा प्रस्ताव विचाराधीन असून, पुढील काळातही खर्चाच्या परिस्थितीनुसार भाड्यात बदल होण्याची शक्यता नाकारता येत नाही.
प्रवाशांची नाराजी
दरवाढीमुळे दैनंदिन प्रवास करणारे विद्यार्थी, नोकरदार, शेतकरी आणि ग्रामीण भागातील प्रवासी यांच्यावर अतिरिक्त आर्थिक भार पडणार आहे. अनेक प्रवाशांनी दरवाढीबाबत नाराजी व्यक्त करताना सेवा सुविधा अधिक सुधारण्याची मागणी केली आहे.
