जळगाव–छत्रपती संभाजीनगर दळणवळण अधिक सुलभ होणार
जळगाव (प्रतिनिधी): उत्तर महाराष्ट्रातील दळणवळण व्यवस्था अधिक सक्षम करण्यासाठी प्रस्तावित ‘खान्देश एक्सप्रेस’ महामार्ग प्रकल्पाला गती मिळत असल्याचे संकेत मिळत आहेत. जळगाव ते छत्रपती संभाजीनगर दरम्यानचा हा महामार्ग थेट समृद्धी महामार्गाशी जोडला जाणार असल्याने प्रवासाचा वेळ लक्षणीयरीत्या कमी होण्याची शक्यता आहे.
सुमारे १०५ किलोमीटर लांबीचा हा प्रस्तावित महामार्ग जळगाव, धुळे व परिसरातील भागांना लाभदायक ठरणार आहे. या मार्गामुळे उद्योग, शेतीमाल वाहतूक, व्यापार तसेच पर्यटन क्षेत्राला चालना मिळणार असल्याचे मत जाणकारांकडून व्यक्त करण्यात येत आहे.
सध्या या प्रकल्पाचा सविस्तर प्रकल्प अहवाल (डीपीआर) तयार करण्याचे काम सुरू असून पुढील टप्प्यात प्रत्यक्ष कामास सुरुवात होण्याची अपेक्षा आहे. महामार्ग पूर्ण झाल्यानंतर जळगाव ते मुंबई तसेच मराठवाड्याकडे जाणारा प्रवास अधिक जलद आणि सुरक्षित होईल.
या महामार्गामुळे खान्देश विभागाच्या विकासाला नवी दिशा मिळेल, असा विश्वास स्थानिक नागरिक व व्यापारी वर्गाकडून व्यक्त केला जात आहे.
